Qazaqstan Prezidenti – Joǵarǵy Bas qolbasshy Mańǵystaý oblysyna jumys sapary barysynda «Oimashy» poligonynda ótken «Otpantaý-2021» shuǵyl-strategiialyq komandalyq-shtabtyq áskeri oqý-jattyǵý jiynyna bardy, dep habarlaidy "Ult aqparat" Aqordaǵa silteme jasap.
Joǵarǵy Bas qolbasshy Bas shtabtyń aldyńǵy sheptegi pýnktin aralap kórip, Qorǵanys ministriniń, áýe qorǵanysy, qurlyq áskeri, áskeri-teńiz jáne desant-shabýyldaýshy áskerler kúshteri basshylarynyń, sondai-aq Qaraǵandy oblysy ákiminiń baiandamasyn tyńdady. Qasym-Jomart Toqaev arnaýly maqsattaǵy bólimderdiń daiyndyǵyn tekserip, qarý-jaraqtar men tehnikalardyń zamanaýi túrlerin kórdi, sondai-aq Aqtaýdaǵy áskeri gospital men Mańǵystaý oblysyndaǵy aviatsiialyq infraqurylymnyń qurylystaryna qatysty prezentatsiiamen tanysty.
Sodan keiin Qasym-Jomart Toqaev belsendi júrgizilgen áskeri ádis-tásilderdiń kórsetilimin biik minberden tamashalady.
Oqý-jattyǵý jiynynyń tártibi boiynsha ártúrli ásker toptarynyń shartty qarsylastaryna qarsy júrgizgen áskeri is-qimyldarynyń qazirgi qarýly qaqtyǵystardyń tájiribesine negizdelgen jańa ádis-tásilderi is-júzinde kórsetildi. Ásker toptarynyń is-qimyldary barysynda áýedegi jáne jerdegi barlaý áreketteri júzege asyryldy. Onyń nátijeleri ushqyshsyz basqarylatyn apparattar men aralas aviatsiia bólimderine týra soqqy jasalatyn nysandardy kórsetip otyrǵan basqarý pýnktine berilip otyrdy.
Sonymen qatar shartty qarsylastardyń ushqyshsyz basqarylatyn apparattaryna qarsy kúres uiymdastyrylyp, kontrbatareialy soǵystyń zamanaýi ádisteri qoldanyldy. Oqý-jattyǵý jiyny barysynda áskerlerdiń utqyrlyq deńgeiiniń joǵary bolýyn qamtamasyz etýge nazar aýdaryldy.
Budan bólek Prezidentke Qarýly Kúshterdiń, vedomstvoaralyq bólimderdiń, sondai-aq elimizdiń ártúrli óńirlerindegi jergilikti atqarýshy organdar men ortalyq memlekettik organdardyń aýmaqtyq bólimsheleriniń júrgizgen is-qimyldary onlain rejimde kórsetildi. Atap aitqanda, Kaspii teńizi aidynynda áskeri teńiz kúshteriniń aviatsiia men arnaiy operatsiialar kúshteriniń qoldaýymen elimizdiń ekonomikalyq nysandaryn qorǵaýǵa baǵyttalǵan is-qimyldary júrgizildi. Osyndai áskeri oqý-jattyǵý jiyndary Qaraǵandy oblysyndaǵy «Saryshaǵan», «Spassk» jáne Almaty oblysyndaǵy «Kóktal» poligondarynda ótti.
Ádis-tásilder kórsetilimi aiaqtalǵannan keiin áskeri qyzmetshiler aldynda sóz sóilegen Joǵarǵy Bas qolbasshy «Oimashy» poligonynda ótkizilgen oqý-jattyǵý jiynynyń mańyzy zor ekenin aitty.
– Bul tarihi meken – eldik pen erliktiń, birlik pen tutastyqtyń simvoly. El shetine jaý tigende babalarymyz osy taýdyń basyna «Uran otyn» jaqqan. Jaýapty sátte bir týdyń astyna jinalǵan. Sondyqtan jurtymyz ony «Birliktiń oty» dep ataǵan. Erlerimiz týǵan jerdi qorǵaý úshin joryqqa Otpantaýdyń baýyrynan attanǵan. Osy jerde ult taǵdyryn sheshetin mańyzdy jiyndar ótken. Bul igi dástúr qazirgi kúnge deiin jetip otyr. Biz batyrlarymyzdyń rýhyna taǵzym etemiz. Sonymen birge dástúr sabaqtastyǵyn saqtaimyz. Eń bastysy, baitaq dalany urpaǵyna miras etken babalar amanatyna adal bolyp, Otanymyzdy qorǵaimyz, – dedi Memleket basshysy.
Prezident áskeri oqý-jattyǵý jiyndarynda, sonyń ishinde halyqaralyq deńgeide turaqty túrde jaqsy nátije kórsetip kele jatqan elimizdiń Qarýly Kúshteriniń áskeri daiyndyǵynyń deńgeii joǵary ekenin atap ótti. Sondai-aq áskerimizdiń naqty soǵys jaǵdaiynda da biikten kórinetinine senim bildirdi.
– Armiiada únemi jańǵyrý úderisi júrgiziledi. Bul zamanaýi syn-qaterler men qaýipterge daiyndyǵymyzdy qamtamasyz etedi. Arnaiy operatsiialar júrgizetin kúshter, barlaý bólimderi men arnaýly maqsattaǵy bólimsheler qarqyndy damyp keledi. Diversiialyq áreketterge qarsy is-qimyldar pysyqtalady. Týra soqqy jasaityn qarýlar men ushqyshsyz basqarylatyn quraldar keńinen qoldanyla bastady, – dedi Prezident.
Memleket basshysy áskeri qyzmetshiler aldynda sóilegen sózinde óńirdegi áskeri-saiasi ahýaldyń kúrdelený jaǵdaiynda ótken búgingi keshendi oqý-jattyǵý jiyny kúshtik qurylymdar men jergilikti atqarýshy biliktiń daǵdarys jaǵdaiyn aýyzdyqtaýǵa ázirligin kórsetkenin jetkizdi.
Joǵarǵy Bas qolbasshy oqý-jattyǵý jiyndary elimizdiń ártúrli óńirinde ornalasqan jeti oqý-jattyǵý poligonynda jáne Kaspii aidynynda ótkenin atap ótti. Jalpy oqý-jattyǵý jiyndary shyǵystan batysqa qarai úsh myń shaqyrym aýmaqty qamtydy.
– Jeke quram men tehnikany óz júristerimen, temirjol jáne áýe qatynastary arqyly jyljytý jumystary pysyqtaldy. Bul Qarýly Kúshterdiń strategiialyq utqyrlyǵyn, qaýip tóndiretin negizgi baǵyttar boiynsha áskeri toptardy jedel qurý múmkindigin kórsetti. Shtabtardyń shuǵyl jaǵdailar kezindegi úilesimdi jumysyn, joǵary tehnologiialy qarýlar men áskeri is-qimyldardy josparlaý ádistemeleriniń qoldanylýyn kórdik. Ákimdikterdiń de daiyndyq deńgeiiniń joǵarylaǵanyna kýá boldyq. Qazirgidei «stress-testileý» kezinde olardyń róli áskeri quramdardan kem túspeidi, – dedi Qasym-Jomart Toqaev.
Prezident armiianyń memleket pen qoǵam tarapynan jiti baqylanatyn nysan ekenin atap ótti. Sondai-aq Memleket basshysy áskerdi zamanaýi qarý-jaraqpen jáne tehnikamen odan ári jabdyqtaýǵa negizdelgen Qarýly Kúshterdi jáne basqa da áskerler men áskeri quramdardy damytý tujyrymdamasynyń bekitilgenin eske saldy.
– Olardyń qatarynda áýe shabýylyna qarsy qorǵanys, ushqyshsyz basqarylatyn ushý apparattary, barlaý jáne radioelektrondy kúres quraldary bar. Maidan, áskeri jáne áskeri-kólik aviatsiia parkin jańartý jumystary jalǵasady. Áskerimiz sheteldik jáne otandyq óndiriste jasalǵan týra soqqy jasaityn zymyran keshenderimen jabdyqtalady. Jalpy Qarýly Kúshterdiń tehnikalyq áleýeti qazaqstandyq armiianyń jańa kelbetin kórsetedi, – dedi Memleket basshysy.
Joǵarǵy Bas qolbasshy áskeri qyzmetshilerge keshendi áleýmettik qoldaý kórsetý máselelerine de toqtaldy.
– Qarjylandyrý máselesi kezeń-kezeńimen artyp keledi. Biyldan bastap áskeri qyzmetshilerdiń laýazymdyq eńbekaqylary 35 paiyzǵa ósti. Aldaǵy eki jylda ortasha eseppen 60 paiyzǵa joǵarylaidy. Barlyq sanattaǵy áskeri qyzmetshiler úshin turǵyn úi máselesi zańnamalyq turǵydan sheshilgen. TMD-nyń basqa elderine qaraǵanda qazaqstandyq áskerdiń áleýmettik toptamasy – básekege qabiletti. Áskeri qyzmetshilerdi áleýmettik qorǵaý máselesi árdaiym memleket basymdyq beretin salalardyń qatarynda bolady. Kúshti ásker – qýatty egemen Qazaqstannyń kepili, – dedi Prezident.
Qasym-Jomart Toqaev sóziniń sońynda minsiz qyzmetteri úshin áskeri qyzmetshilerge alǵys aityp, elimizdiń qaýipsizdigin berik qorǵaityndaryna senim bildirdi.
«Otpantaý-2021» jedel-strategiialyq áskeri-shtabtyń oqý-jattyǵý jiyny áskerimizdiń ázirligin tosynnan tekserýdiń sońǵy kezeńi boldy. Qarýly Kúshterdegi oqý-jattyǵý jiyndary biylǵy qyrkúiek aiynyń basynan beri júrgizilip keledi. Tekseriske 9 myńǵa jýyq áskeri qyzmetshi qatysyp, 3 myńnan astam qarý-jaraq pen áskeri tehnika, onyń ishinde 66 ushý apparaty men 8 keme jumyldyryldy.
