QR Ishki ister ministri Erlan Turǵymbaev adam zorlaý qylmystaryna qatysty pikir bildirdi, dep habarlaidy QazAqparat.
«Adam zorlaý qylmysy bizde zańnamalyq turǵyda jan-jaqty eskerilgen. Arnaiy baptyń birinshi, ekinshi, úshinshi bólimi bar. Toptyq zorlaý jeke qarastyrylǵan. Onyń jazasy da qatal. Degenmen, ár jaǵdaidy jeke alyp qaraý kerek. Men adam zorlaý óte aýyr qylmys dep sanaimyn. Mundaida zábir kórýshiniń azamat retinde de, áiel retinde de konstitýtsiialyq quqyǵy taptalady. Bireýdiń jeke erkindigine qol suǵý arqyly ar-men ujdany qorlanady. Sondyqtan, bul aýyr qylmys, onyń jazasy da aýyr bolýy tiis», - dedi ministr elordada ótken azamattardy qabyldaý sharasynan keiin.
Ol BAQ ókilderine qylmystyq-protsessýaldyq kodekske enýi múmkin ózgertýler men tolyqtyrýlar týraly da aitty.
«Qazir Bas prokýratýra Ishki ister ministrligimen birge jáne ózge de quqyq qorǵaý organdarymen birlesip qylmystyq-protsessýaldyq kodekske ózgertýler daiyndap jatyr. Onyń ishinde túzetý mekemelerine qatystysy da bar. Túrmedegi azaptaý oqiǵalary esterińizde bolar, qylmystyq atqarý júiesine júrgizilip jatqan reformany qaita qurylymdaityn bolamyz. Qoldanystaǵy Qylmystyq-atqarý kodeksine 60-tan astam ózgertý usyndyq. Osynyń bári IIM buiryǵymen emes, zańmen retteletin bolady. Usynystardyń bári Bas prokýratýraǵa joldandy. Ol jerden Parlamentke túsip, talqylanady», - dedi Erlan Turǵymbaev.
