QR Ishki ister ministri Erlan Turǵymbaev politseilerdiń eńbekaqysy qandai kólemde artqanyn aitty, dep habarlaidy QazAqparat.
Búgin Parlament Senatyndaǵy Úkimet Saǵatynda 2019-2021 jyldarǵa arnalǵan ishki ister organdaryn jańǵyrtý boiynsha Jol kartasyn iske asyrý taqyryby talqylandy.
Jol kartasynyń mańyzdy baǵyty qyzmetkerlerge eńbekaqy tóleý jáne áleýmettik qorǵaý júiesin jaqsartýǵa negizdelgen.
«Únemdelgen qarjy men qosymsha biýdjetten bólingen 20 mlrd teńge 2019 jylǵy 1 shildeden bastap qyzmetkerlerge jalaqylaryn saralap arttyrýǵa baǵyttaldy. Osy oraida 65 paiyzǵa patrýldik politsiianyń, 55 paiyzǵa jedel-tergeý bólinisteriniń, 25 paiyzǵa ýchaskelik politsiia inspektory, kámeletke tolmaǵandar isteri jónindegi inspektorlarynyń, sondai-aq 20 paiyzǵa politsiia jáne QAJ qyzmetiniń qalǵan qyzmetkerleriniń eńbekaqysy ósti», - dedi E. Turǵymbaev.
Sonymen qatar ol turǵyn úidi jalǵa alǵany úshin ótemaqy alatyn qyzmetkerlerdiń tizbesi keńeitilgendigin jetkizdi.
«Jedel-tergeý bólinisterimen qatar, osy quqyq ýchaskelik, kámeletke tolmaǵandar isteri jónindegi inspektorlaryna, patrýldik politseilerine berilgen. Qazir ótemaqyny 15571 nemese 46,4 paiyz turǵyn úige muqtaj qyzmetkerler alady», - dedi ministr.
