QR Ishki ister ministri Erlan Turǵymbaev Qyrǵyzstan, Tájikstan jáne Ózbekstan elderindegi áriptesterimen keńes ótkizdi, dep habarlaidy QazAqparat.
QR IIM baspasóz qyzmetinen habarlanyp otyrǵandai, 8-10 tamyz kúnderi aralyǵynda Almatyda Qazaqstan, Qyrǵyzstan, Tájikstan men Ózbekstan Respýblikalary ishki ister ministrleriniń ekinshi keńesi ótedi. Is-shara aimaqtaǵy qaýipsizdikti qamtamasyz etý boiynsha yntymaqtastyqty nyǵaitý sheńberinde ótkiziledi. Atalǵan elderdiń Memleket basshylary byltyr 15 naýryzda elordada ótken kezdesýde osyndai ózara is-qimyldyń jańa formatyna bastamashylyq etken bolatyn.
Keńes jumysyna Qazaqstan Ishki ister ministri E.Turǵymbaev, Tájikstan Ishki ister ministri R. Rahimzoda, Ózbekstan Ishki ister ministri P. Bobojonov, Qyrǵyzstan ókili A. K. Dolosbaev, ishki ister ministrlikteriniń ortalyq apparattarynyń, sondai-aq shekara mańyndaǵy ishki ister organdary qyzmetteriniń basshylary qatysty. Kezdesý barysynda ishki ister organdarynyń zańsyz kóshi-qonǵa qarsy is-qimyl, qylmyskerlerdi izdestirý salasyndaǵy yntymaqtastyq, sondai-aq bóten múlikti urlaýǵa qarsy áreket, shekara mańyndaǵy óńirlerdiń ózara is-qimylynyń ózekti máseleleri qaraldy.
«Sholpan-Ata qalasynda ótken birinshi keńesten beri bir jyl ótti. Búgingi tańda ótken jylǵy kezdesýde qol jetkizilgen, birlesken kelisimder, ásirese shekara mańyndaǵy óńirlerde yntymaqtastyqty nyǵaitýda qosymsha serpin berdi dep aitýǵa barlyq negiz bar. Biz qyrǵyz, tájik jáne ózbek áriptestermen ekijaqty negizde de, kópjaqty formatta da jemisti yntymaqtastyq ornattyq. TMD keńistiginde, ShYU jáne basqa da birqatar halyqaralyq uiymdar sheńberinde qylmysqa qarsy kúrestiń birlesken baǵdarlamalaryn iske asyrýdamyz. Qazirgi kezde esirtki qylmysyna, terrorizmge jáne ekstremizmge, zańsyz kóshi-qonǵa, sondai-aq transulttyq uiymdasqan toptardyń qyzmetine bailanysty kúsh-jigerimizdi biriktirýimiz kerek. Árine, munda keshendi tásil, bizdiń strategiiamyzdy jáne ózara is-qimyl taktikasyn jetildirý qajet. Osy turǵydan alǵanda, bizdiń keńes – problemalyq máselelerdi talqylaý jáne yqtimal qaýipterdiń aldyn alýǵa baǵyttalǵan ýaqtyly sheshimder qabyldaý úshin qolaily alań bolyp tabylady», - dep atap ótti Erlan Turǵymbaev.
Otyrys qorytyndysy boiynsha, ishki ister ministrleri keńes Hattamasyna qol qoidy.
Budan basqa, delegatsiia basshylary transshekaralyq qylmysqa qarsy kúreste Ortalyq Aziia óńiri memleketteriniń ishki ister organdarynyń kúsh-jigerin úilestirýge arnalǵan óńirlik konsýltativtik-keńesshi organ retinde Keńes qyzmetiniń quqyqtyq negizderin bekitti.
