Ishki ister ministri Erlan Turǵymbaev qaza tapqan politseiler Qanat Otarbaev pen Qanat Hamidýllinniń otbasylaryna kóńil aitty, dep habarlaidy QazAqparat IIM silteme jasap.
«Olardyń kásibiligi men parasattylyǵyn, óz qyzmetine adaldyǵyn basshylyq ta, halyq ta baǵalaǵan. Olar áriptesteriniń arasynda syily boldy. Ishki ister organdarynyń barlyq jeke quramy qaza tapqandardyń týystary men jaqyndarymen birge qaiǵyrady», – dedi ministr Erlan Turǵymbaev.
Aita ketsek, politsiia kapitany Qanat Aidarbekuly Otarbaev ishki ister organdarynda 16 jyl qyzmet etken. Artynda jubaiy men úsh balasy qaldy, olardyń eń kishisi 3 jasta. Politsiia kapitany Qanat Bolatuly Hamidýllin ishki ister organdarynda 12 jyl qyzmet etken. Marqumnyń artynda júkti áieli men jeti jasar uly qaldy.
