QR Ishki ister ministri Erlan Turǵymbaev ýchaskelik politsiia inspektorlaryn eseptik kórsetkishten naqty iske kóshýge shaqyrdy, dep habarlaidy QazAqparat tilshisi.
«Búginde biz nátijeni ashylǵan qylmystar sanymen baǵalaýdan alshaqtap kelemiz. Iaǵni, biyl munsha quqyqbuzýshylyq boldy, kelesi jyly taǵy 2-3% kóbirek bolsyn degen túsinikten arylý kerek. Naǵyz kórsetkish - qylmystyń azaiýy men halyqtyń joǵary baǵasy bolýy kerek. Biz júrgizgen saýalnamaǵa 200 myńnan astam halyq qatysty. Olardyń basym kópshiligi ýchaskelik inspektorynyń aty-jónin biledi jáne olarǵa joǵary baǵa berip, syiaqy berýdi, jalaqysyn kóterýdi jáne baspana berýdi surady. Bul - ýchaskelik inspektordyń bedelin kórsetedi. Sondyqtan, qur sanaiǵaqtan arylyp, halyqtyń qurmetine umtylý kerek», - dedi ministr Qazaqstannyń ýchaskelik politsiia inspektorlarynyń sletinde.
Ministr qalalyq jerde túitkildi máselelerdiń kóp ekenin atap ótti.
«Jyl basynda departament basshylaryna Páter ieleri kooperativterimen birlesken jinalys ótkizýdi tapsyrdym. Sebebi, PIK-te barlyq máseleni anyqtaýǵa bolady. Shaǵyn aýdandarda kóptegen páterler jalǵa beriledi. Tynyshtyqty buzý syndy ákimshilik quqyqbuzýshylyqtan bastap, aýyr qylmystar sonda jasalady. Kóp jaǵdaida bizdiń ýchaskelik inspektorlar qulyqsyzdyq tanytyp otyr. Sondyqtan, olardy PIK tóraǵalarymen bailanystyrdyq», - dedi E. Turǵymbaev.
Sondai-aq, jiynda «Politsiianyń úzdik ýchaskelik inspektory» respýblikalyq baiqaýynyń jeńimpazdary marapattaldy.
Baiqaý barysynda elimizdiń 195 myń turǵyny áleýmettik jeli arqyly úzdik isnpektorlarǵa daýys bergen.
«Respýblikalyq mańyzy bar qalalardaǵy úzdik ýchaskelik inspektor» atalymynda Shymkent qalasy Politsiia departamenti ál-Farabi aýdanynyń politsiia basqarmasynyń politsiia inspektory Erbol Iýsýpov úzdik dep tanyldy. Oǵan «Qazaqstan Respýblikasynyń úzdik ýchaskelik isnpektory» diplomy, «Quqyq tártibin qamtamasyz etýge qosqan úlesi úshin» medali jáne 3 laýazymdyq eńbekaqy kóleminde qarjylai syiaqy berildi.
«Oblystyq mańyzy bar qalalardaǵy úzdik ýchaskelik inspektor» atalymy boiynsha Qostanai qalasynyń Politsiia basqarmasynyń ýchaskelik politsiia inspektory Jedilhan Nurpeiisov jeńimpaz atandy. Oǵan da «Qazaqstan Respýblikasynyń úzdik ýchaskelik isnpektory» diplomy, «Quqyq tártibin qamtamasyz etýge qosqan úlesi úshin» medali jáne 3 laýazymdyq eńbekaqy kóleminde qarjylai syiaqy tabystaldy.
«Aýyldyq eldi mekenderdegi úzdik ýchaskelik inspektor» júldesin Almaty oblysy Qaratal aýdany politsiia bóliminiń ýchaskelik politsiia inspektory Qýanysh Erasylov jeńip aldy. Oǵan miinstr «Quqyq tártibin qamtamasyz etýge qosqan úlesi úshin» medali jáne 3 laýazymdyq eńbekaqy kóleminde qarjylai syiaqy berdi.
Odan bólek, saltanatty sharada birqatar ýchaskelik inspektorǵa merziminen buryn arnaiy ataqtar tabystaldy.
Jambyl oblysy Sarysý aýdandyq politsiia bóliminiń ýchaskelik politsiia inspektory Narbekov Qanat Maratulyna jáne Qaraǵandy oblysynyń Politsiia departamenti Abai aýdandyq politsiia basqarmasynyń ýchaskelik inspektory, politsiia kapitany Japparov Damir Qantaiulyna «Politsiia maiory» ataǵy men 2 laýazymdyq eńbekaqy kóleminde qarjylai syiaqy berildi.
Atyraý oblysy Politsiia departamenti Atyraý qalalyq Politsiia basqarmasynyń ýchaskelik inspektory, politsiia aǵa leitenanty Áliev Erden Qanatuly men Aqtóbe oblysynyń Politsiia departamenti Aqtóbe qalalyq politsiia basqarmasynyń ýchaskelik inspektory Sultanǵaliev Dastan Danashuly «Politsiia kapitany» ataǵy men 2 laýazymdyq eńbekaqy kóleminde qarjylai syiaqy aldy.
Odan bólek, birneshe inspektor II dárejeli «Ishki ister organdarynyń úzdigi» tósbelgisimen jáne «Qazaqstan Respýblikasy Ishki ister ministrliginiń Alǵys hatymen» marapattaldy. Marapattalǵan barlyq qyzmetkerlerge qarjylai syiaqy berildi.
QR IIM habarlaýynsha, ýchaskelik politsiia inspektorlarynyń tikelei jumysy arqyly jyl saiyn 40 myńǵa jýyq qylmys ashylady. Elimizde 166 myńǵa jýyq adam, 8,5 myń otbasy jáne 7 myńǵa jýyq kámeletke tolmaǵandar ýchaskelik politsiia inspektorlarynyń baqylaýynda tur.
Aita keteiik, QR Ishki ister ministrligi 2020 jyldy Ýchaskelik politsiia inspektorlarynyń jyly dep atady. 2019 jyldyń 1 shildesinen bastap, birqatar ishki ister organdary qyzmetkerleriniń jalaqysy kóterildi jáne baspana boiynsha ótemaqy tólene basatady.
