Májilistiń jalpy otyrysynda depýtat Erlan Sairov óndiriste adam qaza tapqan jaǵdaida jumys berýshi onyń otbasyna 10 jyldyq jalaqynyń kóleminde bir rettik tólem jónindegi talapty qalypqa keltirýdi usyndy, dep habarlaidy "Ult aqparat".
«Prezident Qasym-Jomart Toqaev jaqynda Ulttyq keńeste sóilegen sózinde eńbek qaýipsizdigi sharalaryn jetildirýge erekshe nazar aýdardy. Sonymen qatar, 2020 jyly respýblika kásiporyndarynda jazataiym oqiǵalardyń nátijesinde 1 503 adam zardap shekti, bul aldyńǵy jyldyń uqsas kezeńimen salystyrǵanda 5 paiyzǵa artyq (1430) jáne ólimmen aiaqtalǵan 208 jazataiym oqiǵa oryn aldy, bul aldyńǵy jyldyń uqsas kezeńine qaraǵanda 15 paiyzǵa artyq (180)», - dedi Sairov Úkimet basshysynyń orynbasary Eraly Toǵjanovtyń atyna joldaǵan saýalynda.
Kásipodaqtar federatsiiasynyń málimetinshe, 192 kásiporynda adam ólimine ákep soqqan jazataiym oqiǵalar oryn alyp, 163 kásiporynda jumys berýshiniń kinási dáleldendi. Bul rette tek 58 kásiporynda kásipodaq uiymdary bar. Bul kórinis jumys berýshilerdiń qyzmetkerler úshin qaýipsiz eńbek jaǵdailaryn qamtamasyz etý máselelerindegi jaýapsyzdyǵyn baiqatady.
«Ólimmen aiaqtalǵan óndiristik jaraqattanýdyń eń joǵary deńgeii dástúrli túrde qurylys salasynda (19 %), taý-ken metallýrgiia salasynda (14 %), aýyl sharýashylyǵynda (8%) baiqalady», - dedi depýtat.
Osy oraila ol Úkimet pen biznes eńbekti qorǵaý men onyń qaýipsizdigine, eldiń eńbek resýrstarynyń sapasyn arttyrýǵa jiti nazar aýdarýy tiis ekenin aitty.
Bul turǵyda depýtattyq saýalda jaǵdaidy túzetý úshin tiisti usynystar aityldy:
1. Óndiriste adam qaza tapqan jaǵdaida jumys berýshi onyń otbasyna 10 jyldyq jalaqynyń kóleminde bir rettik tólem jónindegi talapty qalypqa keltirý. Búginde kásiporyndarda eńbek qaýipsizdigin arttyrýǵa eshqandai ekonomikalyq yntalandyrý joq. Sondyqtan osy salada, adamdardyń ólimine alyp keletin, kózboiaýshylyq pen formalizm qaptap ketken.
2. Eńbekti qorǵaý jónindegi tehnikalyq inspektorlardyń nusqamalaryn oryndamaǵany úshin jaýapkershilik sharalaryn aiqyndai otyryp, olardyń mártebesin quqyqtyq deńgeige shyǵarý qajet. Tiisinshe, eńbek salasyndaǵy qoǵamdyq baqylaýdyń róli men tehnikalyq inspektorlardyń missiiasyn arttyrý kerek.
3. Áleýmettik áriptester eldiń kásipodaqtarymen birlesip, tehnikalyq inspektorlardyń ókilettikterin arttyrý maqsatynda salalyq kelisimderge jáne ujymdyq sharttarǵa eńbekti qorǵaý jónindegi tehnikalyq inspektorlardyń ózektendirilgen ókilettikteri men materialdyq yntalandyrý qadamdaryn engizgen durys.
4. Óndiristegi jazataiym oqiǵalar men kásibi aýrýlardy esepke alý men baqylaýdyń biryńǵai aqparattyq júiesi qalyptastyrý mańyzdy.
5. Óndiristegi jazataiym oqiǵalardan, kásiptik aýrýlardan zardap shekkenderdi jáne kásiptik táýekeli joǵary qyzmetkerlerdi jumysqa ornalastyrý úshin qoldanylatyn mamandyqtar Atlasyn ázirleý mańyzdy.
