Parlament Májilisiniń jalpy otyrysynda depýtat Erlan Sairov bala tárbieleýdiń ulttyq formatyna qatysty Úkimet basshysy Asqar Maminniń atyna saýal joldady, dep habarlaidy "Ult aqparat".
«Qazaqstan Respýblikasynyń basty qundylyǵy - adam jáne adamnyń ómiri. Osy turǵyda, «Nur-Otan» partiiasynyń sailaýaldy baǵdarlamasynda «Otbasyn qoldaý jáne nyǵaitý – elimizdiń tabysty damýynyń kepili» dep aiqyndalǵan. Búginde, jahandaný protsesterinen týyndaǵan aqparattar leginiń eselep ósýine bailanysty, halqymyzdyń rýhani kodyn saqtaý, bala tárbieleýdiń ulttyq formaty deformatsiiaǵa ushyrap barady. Adamdy, dástúrli januia institýtyn qorǵaityn ýaqyt jetti jáne kezek kúttirmeitin mańyzdy másele», - dedi E. Sairov.
Onyń aitýynsha, «Nur-Otan» partiiasynyń sailaýaldy baǵdarlamasynyń «Baqytty otbasy» pýnktin is júzine asyrǵan kezde tiisti qadamdarǵa nazar aýdarý qajet.
«Azamattarǵa keshendi psihologiialyq kómek kórsetý tetigin jaqsartý, sonymen birge, ata-analarǵa quqyqtyq, rýhani, ádistemelik qoldaý kórsetetin «Januiany qoldaý ortalyqtary» institýtyn qura otyryp, ata-anany qoldaý tetikterin qarastyrý óte ózekti. Bul rette balalardy qazirgi ýaqyttyń talabyna sai tehnologiialyq baǵytqa erekshe den qoia otyryp, ulttyq dástúrli qundylyqtar aiasynda oqýshylardyń adamgershiligi men moraldik kelbetin qalyptastyra otyryp tárbieleý, balalar men ata-analarǵa qiyn joldan birlesip shyǵýǵa jol kórsetý máselesi aldyńǵy qatarda bolýy qajet. Azamattardyń óziniń ata-analyq missiiasyn tolyqqandy oryndaýyna jaǵdai jasaý maqsatynda Eńbek kodeksiniń baptary naqty oryndalýy basty mindet.
Ata-analardyń bala tárbieleýge ýaqyty, jaýapkershiligi jáne qaýqary bolýy tiis», - dedi depýtat.
Onyń paiymynsha, pedagogtardyń jáne ata-ananyń balabaqsha, mektep jasyndaǵy balalardy ulttyq qundylyq aiasynda tárbieleý fýnktsiiasyn keńeitken abzal. Osy oraida balalardy tárbieleýdegi mektep pen ata-analardyń birlesken jaýapkershiligin arttyratyn jańa formatqa kóshý óte mańyzdy. Psihologtardyń kásibi daiyndyǵynyń bilim berý baǵdarlamalarynyń mazmunyn jetildirý qajet.
«Bilim jáne ǵylym ministrligi balalardyń durys jáne turaqty psihoemotsionaldyq jan-jaqty damýynyń mazmundy biryńǵai baǵdarlamalaryn ázirleýin qolǵa alǵany abzal. Jumys istep turǵan Keshendi psihologiialyq qyzmetterdiń tiimdiligin arttyryp, olardyń jumysyna qoǵamdyq monitoring jasai otyryp, baǵyt-baǵdaryn keń aýqymdy qoǵam baqylaýynda ustaǵan jón. Bilim berý salasynda psihologtardyń shtatyn kóbeitýdi usynamyz. Áleýmettik jelide jasóspirimderdi sýitsidke itermeleitin aqparatty tejeýdiń utymdy tetigin qalyptastyrý, táýekeli joǵary balalarǵa aldyn alý is-sharalaryn jasaýdyń praktikasyn engizý tetigin qarastyrý ózekti», - dedi E. Sairov.
