Aldymyzda elimizdiń qoǵamdyq-saiasi protsesterin evoliýtsiialyq úlgide sapaly deńgeige ótkizý mindeti tur. Mundai oidy Ulttyq keńestiń otyrysynan keiin keńes múshesi Erlan Sairov bildirdi, dep habarlaidy QazAqparat.
«Eń negizgi másele – bizdiń elimizdegi ekonomikalyq damýdy jalǵastyrý úshin Memleket basshysy «Elimizdegi saiasi-áleýmettik damýsyz ekonomikalyq órleý múmkin emes» degen pozitsiiasyn qaita qaitalady. Keńes músheleriniń bizdiń elimizdegi saiasi reformalary jónindegi ózderiniń ustanymdarymen, aitqan oilarymen kelisti. Bizdiń elimizdegi saiasi júiege liberalizatsiia jasaýǵa, belgili bir qoǵamdyq evoliýtsiia júrgizýge alǵyshart bar degen oidamyn. Sonymen, elimizdegi áleýmettik máselelerdi sheshýge talpynys bar. Naqty usynystarymyzdy Prezident Ákimshiligine beretin bolamyz», - dedi Erlan Sairov Ulttyq qoǵamdyq senim keńesiniń otyrysynan keiin tilshilerge bergen suhbatynda.
Sarapshy óz sózinde árbir júie damýy úshin evoliýtsiialyq jol kerektigin atap ótti.
«Evoliýtsiia – memleket damýynyń eń negizgi kúretamyry. Aldymyzda elimizdiń qoǵamdyq-saiasi protsesterin evoliýtsiialyq úlgide sapaly deńgeige ótkizý mindeti tur. Eń negizgisi – barlyq sharýa halyqpen birlesip, aqyldasyp sheshilýi tiis», - dedi Erlan Sairov.
Eske sala ketsek, búgin elordada Ulttyq qoǵamdyq senim keńesiniń alǵashqy otyrysy ótti. Otyrysqa Qazaqstan Prezidenti Qasym-Jomart Toqaev qatysty.
