Saiasat Nurbek az ýaqyt ishinde Májilistegi zań shyǵarý isine zor úlesin qosty. Bul týraly palatanyń jalpy otyrysynda Májilis tóraǵasy Erlan Qoshanov aitty, dep habarlaidy QazAqparat.
«Áriptesimiz Saiasat Nurbek Memleket basshysynyń sheshimimen Ǵylym jáne joǵary bilim ministri bolyp taǵaiyndaldy. Prezident osy vedomstvoǵa úlken mindet júktep otyr. Sondyqtan áriptesimizge osy qyzmetinde sáttilik tileiik. Parlamentte az ǵana ýaqyt qyzmet etse de, zań shyǵarý isine zor úlesin qosty dep oilaimyn. Óte tanymal depýtat boldy», - dedi Qoshanov.
Osy oraida palata otyrysynda depýtatqa Alǵys hat tabystaldy.
Óz kezeginde Ǵylym jáne joǵary bilim ministri Parlament depýtattarymen tyǵyz qarym-qatynasta jumys isteitinin aitty.
«Maǵan úlken jaýapkershilik júktelip otyr. Referendýmnan keiin «Jańa Qazaqstandy» quramyz dep jatqanda, tuńǵysh taǵaiyndalǵan ministr boldym. Bul rette eki ese jaýapkershilikti sezinip otyrmyn. Bilim men ǵylym, aǵartý isi, jastarymyzdyń bilimi jáne joǵary oqý oryndarymyz myqty ári halyqaralyq standarttarǵa sai bolýyn qalaimyn. Barshamyz birge elimizdiń ǵylymyn kótereiik. Sizderdiń qoldaýlaryńyz óte mańyzdy», - dedi Saiasat Nurbek.
Budan buryn habarlanǵandai, búgin Parlament Májilisiniń jalpy otyrysynda depýtat Saiasat Nurbektiń ókilettigi merziminen buryn toqtatyldy. Ol Ǵylym jáne joǵary bilim ministri laýazymyna taǵaiyndaldy.
