Parlament Májilisiniń jalpy otyrysynda depýtattar Qazaqstan Respýblikasy Parlamenti Májilisiniń tóraǵasy qyzmetine Erlan Jaqanuly Qoshanovty biraýyzdan sailady, dep habarlaidy QazAqparat Májilistiń baspasóz qyzmetine silteme jasap.
Erlan Qoshanovtyń kandidatýrasyn Májilis depýtaty Erlan Sairov usyndy: «Erlan Jaqanuly eńbek jolyn qarapaiym temir sheberinen bastaǵan, eńbek adamynyń múddesin biledi. Zań shyǵarý salasynda keshendi tájiribesi bar, Parlament Senatynyń depýtaty bolǵan, Ókimettiń Parlamenttegi Ókili qyzmetin atqarǵan. Aimaqtardaǵy halyqtyń, azamattardyń áleýmettik muń-muqtajyn jaqsy biledi. Qaraǵandy oblysynyń Jezqazǵan óńirinde eńbek etken, Qaraǵandy oblysynyń ákimi qyzmetin atqarǵan», - dedi.
Otyrys barysynda Erlan Qoshanov Qazaqstan Respýblikasy Konstitýtsiiasy 58-babynyń 1-tarmaǵyna sáikes Qazaqstan Respýblikasy Parlamenti Májilisiniń Tóraǵasy memlekettik tildi erkin meńgergen Májilis depýtattarynyń arasynan Palata depýtattary jalpy sanynyń kópshilik daýsymen jasyryn daýys berý arqyly sailandy.
Depýtattar aldynda sóz sóilegen Májilis Tóraǵasy Erlan Qoshanov óz kandidatýrasyn qoldap, senim kórsetken depýtattarǵa rizashylyǵyn bildirdi.
Ómir jolymnyń birqatar ýaqyty osy Parlament qabyrǵasynda ótti. Sizderdiń senimderińizdiń arqasynda, osy abyroily jumysty birge jalǵastyramyz dep oilaimyn. Parlament Májilisine jetekshilik etý bul, árine, erekshe mártebe. Bul Qazaqstan halqy men Memleket basshysynyń aldyndaǵy zor úlken jaýapkershilik. Bárimizge belgili, el tarihynyń damý kezeńiniń eń jaýapty kezinde turmyz. Osy ýaqytta Prezidentimiz jan-jaqty jáne túbegeili reformalar usynatynyn atap ótti. Bul reformalardy sapaly zańdarmen qamtamasyz etý barlyǵymyzdyń, ásirese, Májilis depýtattarynyń ortaq mindeti. El múddesi úshin adal eńbek eteiik. Májilistiń jumysyn jańa deńgeige kótereiik, - dedi Erlan Qoshanov.
