Ortalyq kommýnikatsiialar qyzmetinde Ulttyq qoǵamdyq keńestiń músheleri uiymnyń aldyna qoiylyp otyrǵan mindetter týraly málim etti, dep habarlaidy QazAqparat tilshisi.
QR Prezidentiniń Keńesshisi, Ulttyq qoǵamdyq keńestiń hatshysy Erlan Qarin Ulttyq keńestiń QR Prezidenti janyndaǵy konsýltativti keńesshi organ bolatynyn aitty.
«Keńestiń negizgi maqsaty - jurtshylyqtyń, saiasi partiialardyń azamattyq qoǵam ókilderiniń qatysýymen memlekettik saiasatqa qatysty ózekti, mańyzdy máselelerge qatysty usynymdardy tujyrymdaý. Negizgi mindetteri - memlekettik baǵdarlamalar men normativtik-quqyqtyq aktilerdiń jobalaryna qoǵamdyq saraptama júrgizý jáne jurtshylyqtyń, azamattyq qoǵamnyń pikirin eskere otyryp, mańyzdy problemalardy talqylaý. Jurtshylyqtyń, saiasi partiialardyń, úkimettik emes sektor men memlekettik organdar ókilderi arasynda syndarly dialogty qamtamasyz etý. Ulttyq keńestiń tóraǵasy Prezidenttiń ózi bolyp tabylady», - dedi Erlan Qarin.
Keńes hatshysy uiymnyń quramyna saiasi partiialar, qoǵamdyq uiymdar ókilderi kirgenin aitady.
«Keńestiń quramyn anyqtaý úshin sońǵy bir aida konsýltatsiialar ótkizilgen bolatyn. Sol konsýltatsiialarda aitylǵan pikirlerdi júielep, osyndai sheshimge keldik. Qoǵam belsendileri mynandai tártipke sáikes irikteldi. Uzaq ýaqyt boiy qoǵamdyq mańyzy bar máselelerdi turaqty kóterip júrgen belsendiler, naqty bir sala boiynsha shuǵyldanyp júrgen kásibi mamandar keńeske kirdi. Olar qoǵamnyń barlyq salasynan irikteldi. Saiasi-qoǵamdyq alańdardyń, túrli saiasi kúshterdiń ókilderin tartýǵa tyrystyq. Eski oppozitsiia ókilderi de, jańa qalyptasyp kele jatqan qarsy toptardyń ókilderi de bar», - dedi ol.
Eske sala ketsek, búgin Memleket basshysy Qasym-Jomart Toqaev Ulttyq qoǵamdyq senim keńesi týraly Jarlyqqa qol qoidy. Sondai-aq keńestiń quramyna kimder engeni belgili boldy.
