Prezidenttiń kómekshisi Erlan Qarin Telegram kanalynda «Qazaqstan Respýblikasynyń keibir zańnamalyq aktilerine inkliýzivti bilim berý máseleleri boiynsha ózgerister men tolyqtyrýlar engizý týraly» zań jobasy Májilis jalpy otyrysynyń birinshi oqylymynda maquldanǵanyn jazdy, dep habarlaidy "Ult aqparat".
«Búgin Májilistiń jalpy otyrysynda «Qazaqstan Respýblikasynyń keibir zańnamalyq aktilerine inkliýzivti bilim berý máseleleri boiynsha ózgerister men tolyqtyrýlar engizý týraly» zań jobasy birinshi oqylymda maquldandy. Atalǵan zań jobasy erekshe qajettilikteri bar balalar úshin sapaly bilim alýǵa birkelki qol jetkizý jaǵdailaryn qamtamasyz etýge baǵyttalǵan», dep jazdy Memleket basshysynyń kómekshisi.
Erlan Qarin atalmysh zańnamalyq basta Ulttyq qoǵamdyq senim keńesinde talqylanǵanyn eske saldy.
«Buǵan deiin, 2021 jylǵy 25 aqpanda Ulttyq qoǵamdyq senim keńesiniń V otyrysynda Prezident Qasym-Jomart Toqaev elimizde erekshe bilim berý qajettilikteri bar balalardyń sany ósip kele jatqanyn, biraq osi iske mamandandyrylǵan uiymdardyń jumysyn retteitin qoldanystaǵy normalar eskirgenin atap ótken bolatyn. Osyǵan bailanysty Memleket basshysy óńirlerdiń ereksheligin jáne zamanaýi standarttardy eskere otyryp, osy saladaǵy normativterdi jańartýdy tapsyrdy», - deidi Erlan Qarin.
Sondai-aq, ol búgin Májiliste qaralǵan zań jobasynda oqý baǵdarlamalary erekshe qajettilikteri bar balalarǵa arnap beiimdeletinin, atalmy sanat úshin jeke damytý baǵdarlamalary ázirlenetinin, psihologiialyq-pedagogikalyq súiemeldeý engiziletinin jetkizgen.
«Múmkindigi shekteýli balalardy psihologiialyq-pedagogikalyq qoldaýǵa memlekettik bilim berý tapsyrysyn qarjylandyrýdyń jan basyna shaqqandaǵy normativi ázirlenetin bolady. Osylaisha, Prezidenttiń Ulttyq keńes qyzmeti sheńberindegi áleýmettik bastamalarynyń taǵy bir mańyzdy blogy Májiliste jumys isteýde. Bul sharalardy zańnamalyq resimdeý erekshe qajettilikteri bar balalar úshin sapaly inkliýzivti bilim alý múmkindigin keńeitýge múmkindik beredi», - dep jazdy Prezident kómekshisi.
