Prezidenttiń keńesshisi Erlan Qarin Parlament Májilisiniń qabyrǵasynda búgin parlamenttik oppozitsiiaǵa qatysty zań jobasynan bólek taǵy da mańyzdy zańdar qaralǵanyn málim etti, dep habarlaidy QazAqparat.
«Búgin Májilis depýtattarynyń parlamenttik oppozitsiia institýtyn engizý týraly zań jobasyn buqaralyq aqparat quraldarynyń ókilderi keń aýqymda talqylap jatyr. Alaida búgin Májilis depýtattary prezidenttik saiasi reformalardyń birqatar mańyzdy zań jobalaryn maquldaǵanyn atap ótý kerek. 2019 jyldyń qyrkúiek aiynda Ulttyq qoǵamdyq senim keńesiniń alǵashqy otyrysynda belgili zańger, quqyq qorǵaýshy Aiman Omarova Qylmystyq Kodekstiń 130-babyn (jala jabý) dekriminalizatsiialap, 174-bapqa (áleýmettik, ulttyq, rýlyq, násildik, múliktik nemese dini alaýyzdyqty týdyrý) ózgeris engizýdi usynǵan edi. Onyń bastamasyn Ulttyq keńeske múshe Erlan Sairov, Murat Ábenov, Muhtar Taijan, Mihail Dorofeev, Marat Shibutov, Andrei Chebotariov, Talǵat Qaliev, Aidos Sarym jáne basqa da birqatar azamat qoldaǵan bolatyn. Bul máseleler Ulttyq keńes músheleriniń usynystaryn qaraý josparyna engizildi. Áitse de birqatar memlekettik organ bul normany kúshinde qaldyrýǵa nemese ishinara dekriminlizatsiialaýdy usynǵan edi», - dep jazady Memleket basshysynyń keńesshisi Facebook -tegi paraqshasynda.
Erlan Qarinniń jazýynsha, osy talqylaýlardyń nátijesinde 2019 jyldyń jeltoqsanynda Ulttyq keńestiń ekinshi otyrysynda Prezident Qasym-Jomart Toqaev Qylmystyq Kodekstiń 130-babyn tolyǵymen dekriminalizatsiialaý týraly sheshim qabyldaǵan. Prezident sonymen birge 174-bapty izgilendirýdi, qoldanystaǵy redaktsiiany túzetýdi usynǵan. Qańtarda tiisti zań jobasy ázirlenip, ol basqa zań jobalary siiaqty ártúrli qoǵamdyq oryndarda jáne Parlament qabyrǵasynda talqylaýlar men pikirtalastardan ótken.
«Mine, búgin birneshe aiǵa sozylǵan qyzý talqydan keiin Májilis «Qazaqstan Respýblikasynyń keibir zańnamalyq aktilerine atqarýshylyq is júrgizý máseleleri boiynsha ózgerister men tolyqtyrýlar engizý týraly» zań jobasyn maquldady. Depýtattardyń bastamasymen «jala jabý» baby tolyǵymen Qazaqstan Respýblikasynyń Ákimshilik quqyqbuzýshylyq týraly kodeksine engizildi. Dál osy zań jobasynda Qazaqstan Respýblikasy Qylmystyq Kodeksiniń 174-babyna ózgerister men tolyqtyrýlar engizildi. Keibireýler bul baptaǵy ózgerister tek redaktsiialyq ózgertýlermen ǵana shekteldi dep sanaidy. Áitse de olai emes. Is júzinde Prezident bul bapty izgilendirýdi tekke usynǵan joq. Memleket basshysy birinshi kezekte bas bostandyǵynan aiyrýdan basqa jaýapkershilik sharalaryn qarastyrýdy usyndy», - deidi ol.
Prezidenttiń keńesshisi jańa túzetýlerge sáikes, bul bap 2000-nan 7000 AEK-ke deiingi mólsherde aiyppul salýdy qarastyratynyn (qazir 2 jyldan 7 jylǵa deiin bas bostandyǵyn shekteý ǵana) jetkizdi.
«Osylaisha bastamalardyń saiasi blogynan basqa (partiialar, sailaý týraly jáne parlamenttik oppozitsiia institýtyn engizý týraly) bizdiń quqyq qorǵaýshylar men jýrnalisterdiń basqa da usynystary júzege asyrylýda. Bul zań jobalary endi Parlament Senatynda talqylanady», - dep túidi Erlan Qarin.
