Foto: primeminister.kz
Memlekettik keńesshi Erlan Qarin qoǵamda qyzý talqyǵa túsken eki jas ministr – Ashat Oralov pen Zúlfiia Súleimenovaǵa qatysty pikir bildirdi, dep habarlaidy QazAqparat agenttigi.
«Áleýmettik jelilerdegi pikirlerge sai, sońǵy kadrlyq ózgerister, ásirese jas kadrlardyń basshylyq qyzmetke ornalasýy qoǵam tarapynan úlken qyzyǵýshylyq týdyrdy. Osyǵan bailanysty jańa ministrler Ashat Oralov pen Zúlfiia Súleimenova Prezidenttik jastar kadrlyq rezervinde ekenin atap ótkim keledi. Bul joba Memleket basshysy Qasym-Jomart Toqaevtyń bastamasymen 2019 jyly qolǵa alynǵan bolatyn. Búgingi tańda Úkimettiń úsh múshesi Prezidenttik jastar kadrlyq rezerviniń ókilderi», - dep jazdy Erlan Qarin óziniń Telegram arnasynda.
Onyń málimetinshe, Prezidenttik jastar kadrlyq rezervinde 350 jas bolsa, sonyń 258-i búginde túrli jaýapty qyzmetterge taǵaiyndalǵan. Onyń ishinde rezervtiń 34 ókili «A» korpýsynyń saiasi jáne memlekettik qyzmetshileri.
«Osylaisha, jas mamandardy basshylyq laýazymdarǵa usyný boiynsha josparly jumys jalǵasýda. Prezidenttik jastar kadrlyq rezervi jobasyn odan ári jalǵastyrý Prezidenttiń sailaýaldy baǵdarlamasynyń basymdyqtarynyń biri», - dep túiindedi Memlekettik keńesshi.
Eske salaiyq, keshe Memleket basshysynyń Jarlyǵymen Ashat Oralov Mádeniet jáne sport ministri laýazymyna taǵaiyndalǵan bolatyn. Ashat Razdyquly - eń jas ministrlerdiń biri. Ol 1990 jyly dúniege kelgen.
Sonymen qatar, sáikes Jarlyqpen bul ýaqytqa deiin vitse-ministr qyzmetin atqaryp kelgen Zúlfiia Súleimenova Ekologiia jáne tabiǵi resýrstar ministri laýazymyna taǵaiyndaldy. Zúlfiia Bolatqyzy da 1990 jyly dúniege kelgen.
