"Qazaqstan" RTRK" AQ Basqarma tóraǵasy Erlan Qarin ańyz akter Djeki Chandy Qazaqstanǵa ákelýge qansha qarajat jumsalǵanyn aitty, - dep habarlaidy kaz.tengrinews.kz tilshisi.
"Búgin Qazaqstan telearnasyndaǵy "Túngi stýdiia" baǵdarlamasynyń erekshe qonaǵy - Djeki Chan. Bir apta buryn ol tuńǵysh ret Qazaqstanǵa ushyp keldi jáne osy suhbatty uiymdastyrý múmkindigi týdy, ol basynda tek Qytai kinosy festivaliniń ashylý saltanatyna qatysýy kerek edi, alaida ol bizge múmkindik jasap, az ǵana ýaqyttyń ishinde baspasóz máslihatyn ótkizip, baǵdarlamaǵa qatysýǵa kelisim berdi, oida joqta boldy, sońǵy sátterde ǵana sheshildi", - dep jazdy ol.
Sonymen qatar, aitýynsha, Djeki Channyń Astanaǵa kelýinen bir tiyn da shyǵyn bolmaǵan eken. "Ol óz ushaǵymen, dostarymen birge keldi, oǵan eshqandai da gonorardy eshkim tólegen joq, eshqandai da raiderin kórsetken joq. Tipti qymbat kólikpen qarsy alýdan da bas tartty, tek qarapaiym miniven surady, sol kólikpen dostarymen birge qalany aralady. Jergilikti astanalyq restoratorlar ańyz adamdy qýana-qýana qonaq qyldy, tipti biz onyń keshki asyna da shyǵyndanbadyq", - dedi Qarin.
Djeki Chanǵa tek EKSPO sýveniri men biletteri berilipti.
"Djeki óte erekshe, óte qarapaiym, qaiyrymdy, adal ári aqkóńil adam eken. Sýretke túsýden de eshkimge qarsy bolmady, ázil aityp, kóńildi júrdi. Ol bizdiń eldi unatyp qaldy, taǵy kelýge de kelisim berdi, birikken jobalarymyzǵa qatysý úshin uzaǵyraq ýaqytqa keledi. Kútemiz", - dep pikir bildirdi "Qazaqstan" RTRK" AQ Basqarma tóraǵasy.
Eske salaiyq, ańyzǵa ainalǵan akter Djeki Chan Qazaqstanǵa 7 maýsymda kelgen bolatyn. Ony Astana ákimi Áset Isekeshev áigili akterdi áýejaidan ózi kútip alǵan edi.
