Foto: facebook.com/karin.erlan
Qazaqstan Respýblikasynyń Memlekettik keńesshisi Erlan Qarin 2023 jyly saiasi kún tártibi qandai bolatyny týraly jazba jariialady, - dep habarlaidy Massaget.kz portaly.
Onyń sózinshe, 2023 jyldyń saiasi kún tártibi Memleket basshysy belgilegen saiasi reformalar vektorymen jáne eń aldymen elimizdiń Konstitýtsiiasyn jańartý boiynsha respýblikalyq referendým nátijelerin is júzinde júzege asyrýmen aiqyndalady.
"Jyl basynan bastap múldem jańa institýt - Konstitýtsiialyq sot óz jumysyn bastaidy. Ol adam quqyqtary jónindegi Ýákil men Bas prokýratýranyń jańa konstitýtsiialyq mártebesimen jáne halyqtyń áleýmettik osal toptaryn qoldaý jónindegi Ombýdsmenniń jańa laýazymyn qurýmen qatar azamattardyń irgeli quqyqtaryn qorǵaýdyń jańa júiesin bailanystyrady", - dedi Qarin óziniń Telegram-arnasynda.
Memlekettik keńesshi 1 qańtardan bastap sailaý zańnamasy men sailaý júiesine engizilgen jańa túzetýler kúshine engenin aitty. Bir mandatty okrýgter men sailaý komissiialaryn qurý protsesi bastalyp jatyr. Endi aýmaqtyq sailaý komissiialarynyń músheleri óz ókilettikterin turaqty kásibi negizde júzege asyratyn bolady. Onyń aitýynsha, bul sailaý protsedýralarynyń sapasyn arttyrady.
"2022 jylǵy kúzde bastalǵan jańa sailaý tsikli jańa jylda da jalǵasady. Parlament Senaty depýtattarynyń sailaýy 14 qańtarda, odan keiin birinshi jartyjyldyqta belgilengen merzimge sáikes ótedi. Saiasi júieni údemeli qalpyna keltirýdiń prezidenttik jospary, Májilis pen barlyq deńgeidegi máslihat depýtattarynyń kezekten tys sailaýy ótkizilýi tiis", - dep jazdy Qarin aldaǵy sailaý naýqany múlde jańa erejeler men normalar boiynsha ótetinin aityp.
Sondai-aq, onyń aitýynsha, 2023 jyldan bastap aýdan jáne oblystyq mańyzy bar qala ákimderin tikelei sailaý pilottyq rejimde ótedi. Aýyl ákimderi korpýsyn jańartý jalǵasady. 350-den asa kent, aýyl jáne aýyldyq okrýg ákimderiniń tikelei sailaýyn ótkizý josparlanyp jatyr. Bul sailaý myńnan asa aýyldyq eldi mekenderdi qamtidy.
"Osylaisha, ózderińiz kórip otyrǵandai, keler jyl burynǵydan kem emes ishki saiasi oqiǵalarǵa toly bolady. Eń bastysy, prezidenttik jańǵyrtý baǵdarlamasyn kezeń-kezeńimen júzege asyrý jalǵasyp jatyr. Bul 2023 jylǵy saiasi kún tártibiniń negizi bolady", - dedi Erlan Qarin.
