Erlan Qarin Qyrǵyzstanda Almazbek Atambaevtyń prezidenttik kezeńin qorytyndylaǵan baspasóz máslihatynda sóilegen sózine qatysty pikir bildirdi, dep habarlaidy QazAqparat tilshisi qazaqstandyq saiasattanýshynyń Feisbýk paraqshasyndaǵy jazbasyna silteme jasap.
«Búgin Prezident Almazbek Atambaev baspasóz máslihatyn ótkizip, prezident bolǵan kezeńin qorytyndylady. Jalpy emotsiialyq mazmunda oiyn jetkizgeni bolmasa, jańalyq bolardai eshteńe aitqan joq. Atambaev bir oiy men bir sózdi ǵana qaitalai beredi. Biraq ár aitqan saiyn sózin emotsiialyq turǵyda jańasha qalyppen jetkizedi», - deidi saiasattanýshy.
Erlan Qarinniń pikirine súiensek, baspasóz máslihatynyń ótetini týraly aldyn ala birshama aitylyp, onyń 2-3 saǵat sozylatyny týraly pikirler bolǵanymen, Atambaev óziniń prezidenttiginiń qorytyndysy týraly eshteńe aita almaǵan, jańa kórsetkishterdi keltirmei, kútilgenindei Qazaqstan tarapyna kezekti márte til tigizgen.
«Biraq, munyń bári ádeii jasalyp otyr. Atambaev antiqazaqy málimdemelerimen eldiń nazaryn negizgi máseleden aýdarýdy oilaidy. Sebebi nátije aitarlyqtai kóńil qýantpai tur - Atambaev óziniń muragerine kóńil kónshitpes mura qaldyra otyryp, prezidenttik taqty tastap barady. Ekonomikalyq saiasatta da ol jaǵdaidy jaqsarta almai, tek eldiń jaǵdaiyn qiyndata tústi. Memlekettik biýdjettiń jetispeýshiligi 2016 jyly 20 mlrd somdy quraǵan bolatyn. Bul Qyrǵyzstan úshin 20 jyldyń ishinde eń rekordty kórsetkish ekenin aita ketken jón. Atambaev prezident bola bastaǵan 2011 jyldan beri biýdjettiń jetispeýshiligi 50 paiyzdan asyp ketti. Buǵan qosa jetispeýshilikti ishki qarjy kózderi esebinen jabý boiynsha kórsetkish 6,5 mlrd somdy quraǵan bolatyn. Al qazir ol san 19 mlrd somǵa jetti», - deidi ol.
Erlan Qarin óz sózinde basqasha aitqanda, ketip bara jatqan prezident jetispeýshilikti jabý úshin (75 paiyzyn) syrtqy qarjy kózderin paidalana otyryp, memlekettiń qaryzyn ósirip jibergenin aitady. Al memlekettik qaryz Qyrǵyzstanda Jalpy ishki ónimniń 62 paiyzyn qurap otyr. Bul da sońǵy 25 jyldaǵy rekordtyq kórsetkish.
«Osydan-aq Qazaqstannyń naqty maqsatty qajettilikke bermek bolǵan 100 mln dollarynan Atambaevtyń nege bas tartqanyn ańǵarýǵa bolady. EAEO-nyń ortaq strategiiasy úshin, iaǵni fitosanitarlyq jáne kedendik baqylaýdy kúsheitý maqsatynda bólingeli otyrǵan qarajatty Atambaev pen onyń komandasy biýdjettiń jyrtyǵyn jamaý úshin qoldanbaq bolǵan. Bunyń iske aspaitynyn bilgennen keiin olar tsirkke uqsas qoiylymdy uiymdastyryp jiberdi», - deidi Erlan Qarin.
Saiasattanýshy sonymen birge, saiasi turǵyda da Atambaev prezidenttiginiń qorytyndysy birkelki emestigin bildirdi.
«Saiasi alań bir-birinen aýytqyp qaldy, ol barlyq opponentterin saiasi keńistikke ysyryp tastady. 2010 jyly ózi birge Sáýir tóńkerisin uiymdastyrǵan jaqtastarynyń barlyǵymen janjaldasty. Elde dini radikalizm beleń alyp barady. Qyrǵyzstannyń Qazaqstanmen ǵana emes, birsypyra eldermen qarym-qatynasy nasharlai tústi. Buǵan qosa ol popýlistik málimdemeler jasai otyryp, sanaly túrde kelesi prezidenttiń jumysyna kedergi keltirip jatyr. Sondyqtan, jalpy qorytyndyǵa «jaǵymsyz» dep baǵa berýge bolady. Atambaev bul máselelerdi sheshýge kúsh salmastan ketip barady. Endigi kezekte, osynaý Atambaev «muraǵa qaldyrǵan máselelerdiń» barlyǵyn murageri sheshýi kerek bolady», - deidi Erlan Qarin.
