«Qaztemirtrans» AQ basqarma tóraǵasy bolyp Erkin Bazarhanov taǵaiyndaldy.
Bul jaiynda «Qazaqstan temir joly» ulttyq kompaniiasynyń BAQ-pen jumys departamentiniń direktory Qaisar Jumabaiuly Facebook paraqshasynda málim etti.
«Erkin Bazarhanov eńbek jolyn burynǵy Taldyqorǵan oblysynda bastaǵan. Jeke qurylymdarda, memlekettik organdarda, sonyń ishinde ortalyq jáne jergilikti atqarýshy organdardyń aimaqtyq bólimderinde, QR Prezidenti ákimshiliginde túrli qyzmetter atqarǵan. «Qaztemirtrans» AQ basqarma tóraǵasynyń mindetin atqarýshy Ǵalym Qashqynbaev óz erkimen qyzmetten ketti» dep jazdy ol.
Aita keteiik, «Qaztemirtrans» AQ - QR júk vagony parkiniń iri operatory. Kompaniia júk vagondarymen qamtamasyz etý, temir jol kóligin jalǵa berý, metall jiyntyqtaryn saqtaý jáne paidalanýǵa berýmen ainalysady.
Erkin Bazarhanov burynǵy Taldyqorǵan oblysynda týǵan. Ál-Farabi atyndaǵy Qazaq ulttyq ýniversitetin, «Turan» ýniversitetin, «tarih jáne qoǵamtaný pániniń oqytýshysy», «zańger» mamandyǵy boiynsha bitirgen.
Eńbek jolyn 1994 jyly Almaty oblysy Úshtóbe qalasy «Samal» shaǵyn kásipornynyń direktory bolyp bastaǵan.
Túrli jyldary ártúrli memlekettik qyzmetterdi atqarǵan. 2009-2013 jyldary Aqmola oblysy Býrabai aýdany ákiminiń orynbasary bolǵan.
2013 jyldan bastap Soltústik Qazaqstan oblysy Temiriazev aýdanynyń ákimi bolyp jumys istegen. QR Prezident ákimshiligi memlekettik baqylaý jáne aýmaqtyq-uiymdastyrý jumysy bóliminiń memlekettik inspektory bolǵan.
