Elimizde koronavirýs indeti órship tur. Dese de, keselmen halqymyz jumyla kúresip, ár óńirdiń qaiyrymdy jandary qoldan kelgen kómegin aiamaýda. Oǵan dálel - qazaqstandyq úzdiksiz bilim berý qaýymdastyǵynyń eriktileriniń oblystyq aýrýhanaǵa ottegi kontsentratyn tartý etýi.
Qyryqtan astam jekemenshik balabaqsha mekemesinen quralǵan qaýymdastyq qyzmetkerleri tynys alý apparatymen qatar basyn qaterge tigip, kúni-túni jumys istep júrgen dárigerlerge alǵysyn bildirip, sý, shokolad ákeldi.
Jiyn barysynda «Árlen» balabaqshasynyń meńgerýshisi Madina Mametova: «Jasandy tynys alý apparatyn Almatydan 600 myńǵa aldyq. Bizdiń maqsat – bir adamǵa bolsa da kómektesý. Mamandardyń aitýynsha bir apparatpen kúnine úsh adam em alady. Jumyla kótergen júk jeńil. Barlyq qaltaly jandar qolynan kelgenshe kómektesse, bul indetti de eńseremiz. Álemdi jailaǵan indet óńirimizde odan ári órshimeý úshin meditsina qyzmetkerleri qiyn jaǵdaida jumys isteýde. Tipti, ózderi de aýyryp jatyr. Sol sebepti qalǵan qarajatqa dárigerlerge qoi eti men qymyz alyp, ystyq sorpa bersek degen josparymyz bar», – dedi.
Jiyn barysynda oblystyq aýrýhananyń direktory Murat Rahmetov qural-jabdyqtardy aýrýhanaǵa jetkizip bergen eriktilerge alǵysyn bildirdi.
– Qazir oblystaǵy aýrýhanada 200 adam emdelýde. Sondyqtan apparat aýadai qajet. Janashyr jandar naýqastarǵa úlken kómek kórsetip jatyr. Bul apparattar mundaǵy naýqastarǵa úlken kómek boldy. Sol úshin osyndai igi is jasaǵan azamattarǵa alǵysymyzdy aitamyz, – dedi Murat Kómekuly.
Aidar QALIEV
