Erejesiz jekpe-jekten “Naiman” laqap atymen tanymal qazaqstandyq Qýat Hamitov kezekti jeńisine qol jetkizip, Táýelsizdik kúnine tartý jasady. Ol óz jeńisin Táýelsizdiktiń 25 jyldyq merekesine arnaitynyn aitty.
Boksshy jeńisinen keiin: «Búgin meniń elimde qasietti mereke. Búgin Qazaqstannyń óz Táýelsizdigine qol jetkizgenine 25 jyl tolyp otyr. Sonymen qatar, men de búgin ózimniń 25-shi jekpe-jegimdi ótkizdim. Men osy jeńisimdi elime, Qazaqstan Táýelsizdiginiń 25 jyldyǵyna arnaimyn», – dedi.
Qýat tebireniske toly sózderin rýhty ánmen jalǵady. Ol sharshy alań tórinde turyp «Elim meniń» ánin shyrqap berdi. Artynsha tizerlei otyryp qazaqtyń kók bairaǵyn súiip, kórermender júregin eljiretti.
Aita ketsek, jerlesimiz Qýat Hamitov Máskeýde ótken "Fight Nights Global 57" týrniri aiasynda reseilik Gadji Rabadanovpen jekpe-jek ótkizip, úshinshi raýndta býyndyrý ádisimen jeńdi.
