Elimizdiń Tuńǵysh Prezidenti Nursultan Ábishuly Nazarbaevtyń: «Bolashaqqa baǵdar: rýhani jańǵyrý», «Uly dalanyń jeti qyry» atty tarihi maqalalary jaryq kórgennen beri umytyla bastaǵan esimder, belgili oqiǵalar eske alynyp, kóptegen igilikti ister atqarylý ústinde.
Biylǵy jyldyń qyrkúiek aiynyń 20-21 kúnderi Ereimentaý aýdanynda «Rýhani jańǵyrý» baǵdarlamasy negizinde belgili qoǵam qairatkeri, Uly Otan soǵysynyń ardageri Ákpan Úkibaevtyń qurmetine úlken igi shara ótkizildi. Ol aýdan kúnimen astarlasqan este qalarlyq mereke boldy.
Ereimentaý aýdanynyń ákimi Abai Áljanov toidyń tusaýkeserin Uly Otan soǵysyna qatysýshylardyń aty-jóni jazylǵan memorialdyq taqtany ashýdan bastady.
Budan keiin Úmbetei jyraý atyndaǵy Mádeniet úiinde «Dáýirdiń dara tulǵasy» atty saltanatty jiyn ótip, onda ataqty el azamaty Ákpan Úkibaevtyń ómiri men eńbek jolyna arnalǵan derekti film kórsetildi. Aýdan ónerpazdarynyń bul mádeni sharaǵa degen daiyndyǵynyń airyqsha bolǵanyn kózimiz kórdi. Halqymyzdyń dástúrli ónerine yntyq jandar óz qurmetterin soqqan shapalaqtarymen bildirip otyrdy.
Tús aýa atalmysh Mádeniet úiinde «Ereimen tarihynda esimi bar» aidarymen aimaqtyq aqyndar aitysy ótti. Oǵan Aqmola, Pavlodar, Shyǵys Qazaqstan, Soltústik Qazaqstan oblystarynan, Semei men Kókshetaý qalalarynan sóz tarlandary qatysyp, el mereiin kóterdi. Ereimenniń dúldilderi de bul kezdesýde ózderiniń bilimderi men ónerlerin jan-jaqty tanyta aldy. Degenmen, aitysty ádil salmaqtaǵan qazylar alqasynyń sheshimimen bas júlde Pavlodar qalasynan kelgen Raýan Qaidarovtyń enshisine tidi.
Ereimen jerinde ótken merekelik sharanyń ekinshi kúninde asyl tuqymdy tórt túliktiń kórmesi uiymdastyrylyp, oǵan jylqy, siyr, qoi men eshkiniń Aqmola óńirinde kezdespeitin tuqymdary shyǵaryldy. Masairaǵan kúnniń shýaǵyna sai toidy qyzyqtap kelýshiler óte kóp boldy. Oǵan qosa «Óner órindegi – Ereimen óńiri» atty jergilikti sýretshiler men qolóner sheberleriniń kórmesi ótti.
Jurtshylyqty eń kóp qyzyqtyrǵany at báigesi boldy. 20 shaqyrymdyq «Alaman báigede» birinshi oryndy Qaraǵandynyń shabandozy Temirlan Maqashev jeńip alsa, 2-shi orynǵa Ereimenniń Aqsýat aýylynyń shabandozy Bektas esimdi bala, 3-shige – Shortandy aýdanynan kelgen atbegi Qaiyrbek Esilbaevtyń «Padishah» atty sáigúligi ornalasty.
10 shaqyrymǵa belgilengen «Toq báige» júldelerin Ereimentaýdyń Óleńti aýylynan shyqqan «Samuryq», ekinshini Aqsýattyń – «Nurai», 3-ni – «Barbi» atty tulparlary jeńip aldy.
Qazaq ómirinen jan-jaqty habar beretin salt-dástúrler toi barysynda jarqyrai kórindi. Qaz-qatar tigilgen aqshańqai kiiz úiler kelgen qonaqtardy zor yqylasy ári qonaqjailyǵymen riza qyldy. Lashyn men búrkit siiaqty qustar ustaǵan saiypqyran jigitterdiń qasyna jinalǵan jurtshylyqtyń áseri erekshe boldy.
Sport oiyndarynyń tamashasy balýandardyń boz kilemdegi beldesýine bailanysty ótti. Jas erekshelikterine qaramai kúsh synasqan jigitter az bolǵan joq. Olardyń birde-bireýi júldeden qur qalmady.
Qalyń jankúierlerdiń kóńilinen shyqqan ádemi sharanyń biregeii – «Jappai kókpar» ataldy. Dala batyrlarynyń bul tartysyna 100-ge jýyq bilekti azamattar qatysyp, kórermenderin keremet qýanyshqa bóledi.
Ereimenniń dástúri, uiymdastyratyn izgi sharalary bizdiń astanalyq óńirde kóp kórinbeitin, az qamtylatyn is der edik. Bul mádeni jumystardy uiymdastyrýda Ereimentaý aýdanynyń ákimi Abai Áljanovtyń, mádeniet bóliminiń jetekshisi Sailaý Jylqybaevtyń, ardagerler keńesiniń tóraǵasy Tólegen Ábdinniń, qoǵam jumysynyń belsendileri Mánap Ádireshev, Qonys Álimjanov, Sailaý Baibosyn men Qaiyrken Bilálovtyń atqarǵan isteri ólsheýsiz der edim. Saltanatty merekede osy eldiń ardaqty azamaty, elimizge tanymal tulǵa Ákpan Úkibaevtyń qurmetine arnaiy as berilip, quran baǵyshtaldy.
Janat TÚGELBAEV,
Qazaqstannyń Qurmetti jýrnalisi.
