Erekshe bilim berýge qajettiligi bar balalarǵa túzetý kómegin kórsetýge arnalǵan memlekettik tapsyrys engiziledi. Bul týraly QR Bilim jáne ǵylym ministri Ashat Aimaǵambetov aitty, dep habarlaidy "Ult aqparat".
«Sońǵy ýaqytta erekshe bilim berýge qajettilikteri bar balalar sany kóbeiip jatyr. Osy sanattaǵy balalardyń erekshe qajettilikterin anyqtalǵannan keiin, olardy qurdastarymen qatar oqytý úshin arnaiy pedagogterdiń kómegi qajet. Eń bastysy, mamandar ár balanyń qajettilikterine súiene otyryp jeke túzetý baǵdarlamasyn daiyndap ony júzege asyratyn bolady», - dep jazdy ministr Facebook paraqshasynda.
Onyń atap ótýinshe, mundai kómek alǵan balalar inkliýzivti ortaǵa jaqsy beiimdeledi. Sonymen qatar, oqý materialyn áldeqaida ońai igeredi. Al keibireýleri erekshe kómekke muqtajdyqtan tolyǵymen arylady. Olarmen defektologtar, psihologtar, logopedter jáne basqa da mamandar jumys isteidi.
«Qazirgi ýaqytta mundai balalardyń sany óskendikten, arnaiy ortalyqtar jetispeidi. Ýaqytyly kómek bolmaǵandyqtan, bul erekshelikterdi túzetý jáne balany bilim berý ortasyna qosý qiynǵa soǵyp jatyr. Endi bul norma memlekettik emes uiymdarǵa osyndai qajet ortalyqtardy ashýǵa jáne kórsetilgen qyzmetter úshin biýdjetten qarjy alýǵa múmkindik beredi. Bul mehanizm jeke balabaqshalardyń qyzmetimen birdei. Esterińizge sala keteiin, dál osyndai tetik arqyly balalardy mektepke deiingi tárbie berý mekemelerimen qamtýdy birden arttyrǵan edik», - dedi Ashat Aimaǵambetov.
