Qasym-Jomart Toqaev Ankaraǵa memlekettik sapary barysynda Túrkiia Prezidenti Rejep Taiip Erdoǵanmen kelissóz júrgizdi, dep habarlaidy "Ult aqparat" Aqordanyń resmi saityna silteme jasap.
Kelissózderge deiin Prezident saraiynda saltanatty túrde resmi qarsy alý sharasy ótti. Qurmet Qaraýylynyń bastyǵy eki el basshylaryna raport berip, Qazaqstan men Túrkiianyń ánurandary shyrqalǵannan keiin Qasym-Jomart Toqaev pen Rejep Taiip Erdoǵan bir-birine resmi delegatsiialardyń quramyn tanystyrdy.
Saltanatty rásimnen keiin shaǵyn quramda kezdesý boldy. Memleketter basshylary saiasi, saýda-ekonomikalyq jáne mádeni-gýmanitarlyq salalardy keńeitýge erekshe kóńil bóle otyryp, qazaq-túrik strategiialyq seriktestiginiń aýqymdy máselelerin talqylady. Sonymen qatar jahandyq jáne aimaqtyq kún tártibindegi problemalar qarastyryldy.
Qazaqstan Prezidenti baýyrlas Túrkiia Respýblikasyna memlekettik saparmen kelýge shaqyrǵany úshin Rejep Taiip Erdoǵanǵa rizashylyǵyn bildirdi.
Shaǵyn quramdaǵy kezdesý sońynda Memleket basshysy Túrkiia Prezidentin elimizge saparmen kelýge shaqyrdy.
Rejep Taiip Erdoǵan Túrkiiaǵa saparmen kelgeni úshin Qasym-Jomart Toqaevqa alǵys aitty. Sonymen qatar Erdoǵan Toqaevtyń Qazaqstanǵa shaqyrýyn rizashylyqpen qabyl alyp, biyl kúzde elimizge keletinin jetkizdi.
