Túrkiia prezidenti Rejep Taiyp Erdoǵan Qytaidyń Shyńjań-Uiǵyr avtonomiialyq aýdanyndaǵy etnikalyq toptardyń barlyǵy baqytty ómir súrip jatqanyn málimdedi, dep habarlady RIA Novosti.
Buǵan deiin túrik biligi Qytaidy Shyńjańdaǵy uiǵyrlarǵa qysym kórsetip, olardy túzetý lagerlerinde májbúrlep ustap otyr dep aiyptaǵan edi. Alaida Erdoǵan Qytaiǵa sapary kezinde basqasha sóiledi.
"Qytaidyń Shyńjań ólkesindegi barlyq halyq baqytty ómir súrip jatyr, túrik tarapy eshkimge Qytai men Túrkiia arasyndaǵy óshpendilikti qozdyrýǵa jol bermeidi", - dedi Erdoǵan QHR tóraǵasy Si Tszinpinmen kezdesýinde.
Ol Túrkiianyń radikalizmge qarsy ekenin jáne saiasi senim men qaýipsizdikti nyǵaitýdy qoldaitynyn aitty.
Aqpan aiynda Túrkiia syrtqy ister ministrliginiń ókili Hami Aksoi Qytaidy etnikalyq uiǵyrlardyń quqyqtaryn qurmetteýge jáne olardy kúshtep qamaýda ustaýǵa arnalǵan lagerlerdi jabýǵa shaqyrdy.
Aksoi "21-ǵasyrda kontsentratsiialyq lagerlerdiń qaitadan paida bolýy – búkil adamzat úshin masqara" dep málimdedi. Onyń aitýynsha, "millionnan astam uiǵyr túrmelerde jáne kontslagerlerde kúshtep ustaý, azaptaý jáne ideologiialyq ońaltý saiasatymen betpe-bet kelgen".
Qytai syrtqy ister ministrligi bul málimdemeni "jiirkenishti" dep atap, narazylyq bildirdi. Naýryz aiynyń basynda Qytaidyń Túrkiiadaǵy elshiligi osy málimdeden keiin Qytaidyń Izmirdegi Bas konsýldyǵyn ýaqytsha jabatynyn jariialady.
Aita keteiik, buǵan deiin Qytaida myńǵa jýyq etnikalyq qazaq saiasi tárbieleý lagerlerinde otyrǵany habarlanǵan edi. Qazaqstan syrtqy ister ministrligi olardy bosatý jumystaryn júrgizip jatyr jáne Qazaqstan azamattyǵyn alyp, tarihi otanyna oralýǵa kómektesýde.
Qytaida 1,5 millionnan astam etnikalyq qazaq turady.
