Almatyda tuńǵysh ret til merekesi jańa datamen toilandy. Ǵylym Ordasynyń «Qysqy baǵynda» Ahmet Baitursynovtyń týǵan kúnimen qatar Qazaqstan halqynyń tilderi kúnine orai respýblikalyq ǵylymi-praktikalyq konferentsiia ótti, dep habarlaidy QazAqparat tilshisi.
Saltanatty basqosýda ǵalymdar latyn qarpine kóshýde til emlesin jasaýdaǵy máselelerge toqtaldy. Ahmet Baitursynov atyndaǵy Til bilimi institýtynyń direktory Erden Zadaulynyń aitýynsha, emle jasaýdaǵy qiyndyqtar kirme sózderge kelip tireledi.
«Bizde qazirgi týyndap jatqan máselelerdiń qazaqtyń tiline qatysy joq. Negizgi kedergi - kirme sózder. Emle jasalǵanda bir tildiń sózderi ǵana taiǵa tańba basqandai daiarlanýy kerek. Adamdar qazaq tiline orystyń sózderin qystyrmai sóilei almaidy, másele sonda. Jaǵdai óte qiyn. Ǵalymdardyń shamasy jetpei jatyr», - dedi Erden Qajybek.
Professor 2025-jylǵa deiin shubar tilden arylý keregin atap ótti.
«Kezinde Ahań «qazaq tili túrki halyqtarynyń ishinde eń taza til» ekenin aitqan. Qazir olai emes. Biraq bizde 2025 jylǵa deiin múmkindik bar. Bizdiń tilimizdiń ishinde shynynyń synyqtary siiaqty shyǵarylýy tiisti elementter bar. Batpandap kirgen dúnie mysqaldap shyǵady. Taǵy bir másele - túrikterdiń tájiribesine qarap jazý tilimizdi túzetý. Múmkindiginshe janastyrý jaǵyna qarai ikemdelýimiz kerek. Al qazirgi qabyldaǵan álipbiimiz janastyrýdyń yńǵaiyna kelińkiremeidi. Ahań aitqandai, qazaq pen qyrǵyzdyń ortaq álipbii kerek. Ǵalymdar ózara bátýǵa kelip, aqyldasyp, synǵa qýanýdy úirenbeiinshe emle jumysy jalǵasa beredi», - dedi Erden Qajybek.
Sondai-aq ol Ahmet Baitursynovtyń «Álipbi tilge shaq bolýy kerek», - degen sózin eske túsirip, dybys sanynan árip sanynyń az bolǵanyn jón sanaitynyn jetkizdi.
Budan ózge, plenarlyq otyrysta Ýálihan Qalijanov bastaǵan ǵalymdar toby latyn álipbiine arnalǵan baiandamalaryn oqydy.
Bul kúni ǵalym Ahmet Baitursynovtyń eńbekteriniń kórmesi uiymdastyryldy.
