QR Ulttyq bank tóraǵasy Erbolat Dosaev teńgeniń nyǵaia túsý sebebin túsindirdi, dep habarlaidy QazAqparat.
«Biyl mamyrda ishki valiýta naryǵy syrtqy jáne ishki faktorlardyń oń áserinen damydy. Munai baǵasynyń ósimi Qazaqstannyń saýda áriptesteri elderiniń valiýtalaryna qolaily áser etti. Resei rýbli mamyrda bir AQSh dollary úshin 70,14 rýblge deiin 5,7%-ǵa, eýro – bir eýro úshin 1,11 AQSh dollaryna deiin 1,3%-ǵa nyǵaidy», - dedi Úkimet otyrysynda Ulttyq bank tóraǵasy Erbolat Dosaev.
Onyń aitýynsha respýblikalyq biýdjetke kepildendirilgen transfertti bólý maqsatymen Ulttyq qordan valiýtany josparly satý ulttyq valiýtaǵa qosymsha qoldaý kórsetken.
«Ótken aida kvazimemlekettik sektordyń kompaniialary eksporttyq valiýtalyq túsiminiń bir bóligin mindetti satý jóninde qabyldanǵan sharalary jalǵasty. Mamyrda kvazimemlekettik sektor sýbektileriniń satý kólemi bir aida 156 mln AQSh dollaryn qurady. Munaidyń álemdik baǵasynyń ósýi ishki qolaily faktorlarmen qatar teńgeniń aiyrbastaý baǵamynyń mamyrdaǵy bir AQSh dollary úshin 424,57 teńgeden 411,55 teńgege deiin 3,1%-ke nyǵaiýyna yqpal etti. 8 maýsymdaǵy saýda-sattyqtyń qorytyndysy boiynsha ortasha baǵam bir AQSh dollary úshin 397,27 teńge deńgeiinde qalyptasty», - dedi ol.
