Úkimettiń keńeitilgen quramdaǵy otyrysynda Ulttyq bank tóraǵasy Erbolat Dosaev teńge baǵamyna qatysty túsinik berdi, dep habarlaidy "Ult aqparat".
«2020 jyly Qazaqstannyń valiýta naryǵy kúrdeli kútpegen ózgeristerdi ótkerdi. Jahandyq pandemiia jáne shikizat naryqtaryndaǵy kútpegen ózgerister 2020 jylǵy naýryzda teńge baǵamynyń 17 paiyzǵa 448,5 teńgege deiin álsireýine ákeldi. Osynyń aiasynda Ulttyq bank Úkimetpen birlesip, ishki valiýta naryǵynda turaqtylyqty qamtamasyz etý boiynsha sharalar keshenin qabyldady», - dedi E. Dosaev.
Onyń aitýynsha, tiisti qabyldanǵan sharalardyń arqasynda teńgeniń aiyrbastaý baǵamy álsireýin birshama ótep, 2020 jyldyń sońyna qarai 6,1 paiyzǵa 420,91 teńgege deiin nyǵaidy.
«Nátijesinde, damýshy naryqtar valiýtalarynyń aitarlyqtai álsireýi aiasynda teńgeniń baǵamy bir jyl ishinde tek 10 paiyzǵa tómendedi. 2021 jyly ózgermeli baǵam rejimin nyǵaitý jáne Ulttyq qordyń aktivterin konvertatsiialaý jáne naryqtyń qubylmalylyǵyn retteý operatsiialaryn júrgizý kezinde naryqtyq qaǵidattardy saqtaý boiynsha odan ári sharalar qabyldanatyn bolady», - dedi UB basshysy.
Onyń sózine qaraǵanda, 2015 jyldan beri baiqalǵan tólem balansynyń sozylmaly tapshylyǵy syrtqy jaǵdailardyń nasharlaýy aiasynda kúsheie túsken.
