QR Ulttyq bankiniń tóraǵasy Erbolat Dosaev koronavirýs indetiniń álemdik ekonomikaǵa áseri jaiynda aityp berdi, dep habarlaidy QazAqparat.
«2021 jyldyń ortasyna deiin pandemiiany tejeý shekteýlerdi saqtap, qajet bolǵan kezde olardy kúsheitý kerek bolady. Bul álemdik ekonomikanyń qalpyna kelýin edáýir toqtata turýy múmkin. Ekinshiden, álemdik taýar naryqtary, ásirese munai naryǵy qubylyp tur. Eýropanyń birqatar iri elinde jańa lokdaýndar engizý munaiǵa suranystyń qalpyna kelý qarqynyna yqpal etedi, onyń nátijesinde munai óndirý qaitadan suranystan asyp ketýi múmkin», - dedi Dosaev Senattyń jalpy otyrysynda.
Onyń aitýynsha, munai baǵasynyń qarqyny kóp jaǵdaida biylǵy 30 qarasha - 1 jeltoqsanda ótetin OPEK+-tiń ministrlik kezdesýiniń qorytyndysyna bailanysty bolady, onda 2021 jyly munai óndirý kvotalary týraly sheshim qabyldanady.
«Úshinshiden, álem ekonomikasynyń qalpyna kelýi saýda shekteýlerin alýǵa jáne jetkizý tizbegin qalpyna keltirýge bailanysty bolady. Aziia-Tynyq muhit óńirinde Qytai men úlesine álemdik ekonomikanyń 29 paiyzy tiesili 14 eldiń arasynda álemdegi eń iri erkin saýda aimaǵyn qurý oń belgi boldy. Jańa kelisim álemdik ekonomikanyń qalpyna kelý qarqynyna oń áser etýi múmkin», - dedi UB basshysy.
Onyń sózine qaraǵanda, osy jaǵdailarda álemdik ekonomikanyń qalpyna kelýi 2021 jyldan bastalady, birinshi bolyp daǵdarystan damyǵan elder shyǵa bastaidy. Halyqaralyq valiýta qorynyń (HVQ) boljamy boiynsha tómen bazanyń aiasynda álemdik ekonomikanyń ósýi 2021 jyly 5,2 paiyzǵa jetip, orta merzimdi perspektivada 3,5 paiyzǵa deiin birtindep baiaýlaidy.
