Jyl saiyn 200 myń gektarǵa jýyq jer sýarylmai paidalanylady. Bul týraly búgin Úkimet otyrysynda QR Aýyl sharýashylyǵy ministri Erbol Qarashókeev aitty, dep habarlaidy QazAqparat.
«Únemi ósip kele jatqan sý resýrstarynyń tapshylyǵy jaǵdaiynda sýdy esepke alyp, utymdy bóletin tsifrlyq tehnologiialardy engize otyryp, kanaldar men sý qoimalaryn salý jáne rekonstrýktsiialaý máselelerin ózekti ári der kezinde kóterilgen máseleler dep esepteimiz.
Kanaldar men sý qoimalaryn rekonstrýktsiialaý jáne qalpyna keltirý jobalaryn iske asyrý nátijesinde 2021 jyly sý sharýashylyǵy infraqurylymy júrgizilgen alań 1,6 mln gektardy qurady, onyń ishinde 1 mln 527 myń gektar jerde óńdep ósirilýde, bul 2020 jylǵa qaraǵanda 16,8 myń gektarǵa kóp. Atalǵan alańnyń 1 mln 182 myń gektary nemese 77,4%-y jer ústi sýarý tásiline tiesili, 96,3 myń gektary nemese 6,3%-y – negizinen jappai sý basý ádisimen sýarylatyn kúrish alqaptary, tek 248,4 myń gektarǵa nemese 16,2%-yna ǵana zamanaýi tamshylatyp nemese jańbyrlatyp sýarý paidalanylady», - dedi Qarashókeev.
Statistika derekteri boiynsha sýarmaly jerlerde maily, dándi, azyqtyq daqyldar, kókónis-baqsha daqyldary, maqta, kartop, kúrish, qant qyzylshasy ósiriledi.
«Sonymen qatar jyl saiyn 200 myń gektarǵa jýyq jer sýarylmai paidalanylady, iaǵni maqsatyna sai paidalanylmaidy. Osyǵan bailanysty oblystar ákimdikteri nysanaly maqsaty boiynsha paidalanylmaityn jerlerdi alyp qoiyp, zańnamada belgilengen tártippen adal jer paidalanýshylarǵa berý jumystaryn jandandyrýy qajet», - dedi ministr.
