Búgin Prezident Qasym-Jomart Toqaevtyń Qazaqstan halqyna Joldaýynda aitylǵan tapsyrmalaryn túsindirý jáne oryndaý jónindegi jumys sapary aiasynda Premer-Ministrdiń orynbasary Eraly Toǵjanov bastaǵan delegatsiia Batys Qazaqstan oblysynyń áleýmettik nysandaryn aralady, dep habarlaidy "Ult aqparat".
Birinshi nysan - óńirdegi jetekshi zamanaýi "Uniserv Medical Center" klinikasy, onda meditsinalyq qyzmetterdiń tolyq spektri kórsetiledi.
Budan ári vitse-Premer Terekti aýdanynyń Podstepnoe kentindegi dene shynyqtyrý-saýyqtyrý kesheniniń jáne Zachagansk kentindegi burynǵy meiramhana ǵimaratynda ashylǵan "Shabyt" mektepten tys jumys ortalyǵynyń qyzmetimen tanysty. Atqarýshy organdardyń qoldaýymen jergilikti kásipkerler memlekettik-jeke menshik áriptestik aiasynda oiyn-saýyq biznesin áleýmettik jobaǵa qaita beiimdedi.
Eraly Toǵjanov Memleket basshysynyń Joldaýda balalar sportyn damytýǵa basymdyq bergenin airyqsha atap ótti. Qazirgi ýaqytta Batys Qazaqstan oblysynda mektepten tys qosymsha bilim berýmen qamtý kórsetkishi 98,7% - dy quraidy. Oblystyń on myńdaǵan jasóspirimderiniń úiirmeler men jastar ujymdarynda shyǵarmashylyqpen jáne sportpen shuǵyldanýǵa múmkindigi bar.
Sondai-aq, delegatsiia áleýmettik kásipkerlik baǵdarlamasy aiasynda ashylǵan nysandardy aralady. Atap aitqanda, "Protezdeý jáne ortopediia ortalyǵy", erekshe qajettilikteri bar azamattarǵa konsýltatsiialyq jáne psihologiialyq qoldaý kórsetiletin "Teń qoǵam" áleýmettik qoldaý ortalyǵy.
Sapar aiasynda Premer-Ministrdiń orynbasary óńirdegi epidemiologiialyq ahýal máseleleri boiynsha oblys aktivimen keńes ótkizdi.
E. Toǵjanov COVID-19-ǵa qarsy vaktsinatsiialaý deńgeiin kúsheitýdi, sondai-aq óńirdegi epidemiologiialyq jaǵdaidyń nasharlaýyna jol bermeý úshin barlyq qajetti sharalardy qabyldaýdy tapsyrdy.
Keńes sońynda Premer-Ministrdiń orynbasary oblys basshylyǵynyń áleýmettik máselelerdi sheshý jónindegi oń jumysyn atap ótti – óńirde shaǵyn jinaqtalǵan, úsh aýysymdy mektepterdiń ornynda zamanaýi bilim berý nysandary salynýda, memlekettik-jekeshelik áriptestik belsendi damýda, halyqtyń osal toptaryna qoldaý kórsetilýde.
Vitse-Premer oblys ákimdigine óńirdi damytý jáne Memleket basshysy alǵa qoiǵan mindetterdi sheshý jóninde birqatar naqty tapsyrmalar berdi.
