2020 jyly koronavirýstyń taralýy kezeńinde Aqparat ministrliginiń jumysy erekshe boldy. Bul týraly QR Premer-Ministriniń orynbasary Eraly Toǵjanov málim etti, dep habarlaidy "Ult aqparat".
«Ásirese, «halyq únine qulaq asatyn memleket» tujyrymdamasyn júzege asyrý eń aldymen ministrliktiń tikelei qyzmetine bailanysty. Der kezinde halyqqa jetkize bilý, halyqqa túsindire bilý mańyzdy. Osy oraida qiyn jaǵdaida eshteńe jasyrylǵan joq, barlyǵy elge jariialandy», - dedi E. Toǵjanov QR Aqparat jáne qoǵamdyq damý ministrliginiń keńeitilgen alqa májilisinde.
Bul turǵyda ol atalǵan ministrlik tarapynan aýqymdy jumystar atqarylǵanyn jetkizdi.
«Aqparat salasynda jumys isteitin barlyq azamattarǵa alǵys aitýǵa ruqsat etińizder. Qiyn jaǵdaida birde-bir azamat keiin tartpady. Osy kezeńde eshqaisysy basyn buǵyp qalmady, tikelei atsalysty», - dedi Úkimet basshysynyń orynbasary.
«Volonterlik baǵytta kóptegen is-sharalar atqaryldy. Osy oraida Prezidenttiń tikelei tapsyrmasymen tiisti jumystar júzege asyryldy. Bul jumysty ary qarai jalǵastyrýǵa qatysty tapsyrmalar berildi, sondyqtan osyny iske asyratyn bolamyz», - dedi Eraly Toǵjanov.
