Eýropalyq kompaniialar Qazaqstanǵa investitsiia salýǵa qyzyǵýshylyq tanytyp otyr. Bul týraly Bishkekte «Eýropalyq Odaq – Ortalyq Aziia» ekonomikalyq forýmynda EO-nyń Qazaqstandaǵy elshisi Kestýtis Iankaýskas aitty, dep habarlaidy QazAqparat tilshisi.
«Forým barysynda Eýropalyq komissiianyń tóraǵasy Ýrsýla fon der Liaien Ortalyq Aziianyń gúldenýi Eýropa úshin mańyzdy ekenin atap ótti. Birinshi kezekte óńir EO úshin seriktes retinde mańyzdy bolyp tur. Sonymen qatar, bizdiń yntymaqtastyq Ortalyq Aziia men EO aýmaǵynda beibitshilik pen turaqtylyqty saqtaý turǵysynda basymdyqqa ie. Ekinshiden, saýda salasyna erekshe mán berilip otyr. Bul baǵytta eleýli jetistikter bar, iaǵni óte jaqsy negiz bar dep aitýǵa bolady. Degenmen, saýda qatynastaryn aldaǵy ýaqytta da nyǵaita túsý kerek dep sanaimyz», - dedi Kestýtis Iankaýskas.
Onyń aitýynsha, eýropalyq kompaniialar Qazaqstanǵa investitsiia salýǵa qyzyǵýshylyq tanytyp otyr.
«Barlyq elderge sońǵy býyndy tehnologiialar kerek. Osy baǵytta yntymaqtastyq mańyzdy dep bilemiz. Budan bólek, EO qorshaǵan ortany qorǵaý máselelerine ekpin qoiyp otyr. Biz klimattyń ózgerýi problemalaryn jalǵyz eńsere almaitynymyz túsinikti. Sondyqtan osy salada Ortalyq Aziia elderin óte mańyzdy seriktes dep sanaimyz», - dedi EO elshisi.
Bul turǵyda ol Qazaqstan Prezidenti Qasym-Jomart Toqaev qorshaǵan ortany qorǵaý, klimattyń ózgerýi máselelerin sheshýge qatysty airyqsha mán berip otyrǵanyn atap ótti.
Budan buryn habarlanǵandai, biyl 5 qarashada Bishkekte Premer-Ministrler deńgeiinde «Eýropalyq Odaq – Ortalyq Aziia» ekonomikalyq forýmy ótti.
QR Úkimet basshysy Asqar Mamin 2023 jyly «Eýropalyq Odaq – Ortalyq Aziia» ekonomikalyq forýmy boiynsha Qazaqstandy qabyldaýshy tarap retinde usyndy.
Forýmǵa onlain-rejimde qosylǵan Eýropalyq komissiianyń tóraǵasy Ýrsýla fon der Liaien Ortalyq Aziia klimattyń ózgerýi saldaryn kórip jatqanyn aitty.
