Eýroodaq narazylyq aktsiiasyna qatysqandarǵa kúsh qoldanyp, negizsiz qamaǵan jáne sailaý qorytyndysyn burmalaǵan belarýs biligi ókilderine sanktsiia salýy múmkin. EO-nyń syrtqy saiasat jónindegi vedomstvo jetekshisi Jozep Borreldiń seisenbi kúni jariialaǵan málimdemesinde osylai dep aitylǵan.
Málimdemede Belarýste 9 tamyzda ótken prezident sailaýynyń ádil, erkin ótpegeni jáne EQYU standarttaryna sáikes kelmegeni jazylǵan. Buǵan qosa, málimdeme avtorlary Belarýs biliginiń narazylyq aktsiiasyna qatysýshylarǵa artyq kúsh qoldanǵanyn synap, sonyń kesirinen keminde bir demonstrant qaza bolǵanyn, kóp adam jaraqattanǵanyn atap ótken.
EO Belarýs biligin ustalǵan azamattardyń barlyǵyn shart qoimai shuǵyl bosatýǵa shaqyrǵan.
Málimdemede 2015 jyldan beri EO men Minsk arasyndaǵy qarym-qatynastyń jaqsarǵany, alaida adam quqyǵyn óreskel taptaý faktilerine bailanysty nasharlaýy múmkin ekeni aitylǵan. Onda sonymen birge jaǵdai ýshyqpas úshin bilikti qoǵammen dialog ornatýǵa shaqyrǵan usynys ta bar.
Polsha, Litva jáne Ýkrainanyń syrtqy ister ministrleri ortaq málimdeme jasap, Belarýs biligin azamattyq qoǵammen dialog ornatýǵa shaqyrǵan jáne sondai dialogtardy uiymdastyrý boiynsha araaǵaiyndyq jasaýǵa daiyn ekenin de jetkizgen.
Buǵan deiin Belarýs SIM EO "naqty ne bolǵanyn bilýge tyryspai, eldegi jaǵdaiǵa baǵa berýge tyrysady" dep málimdegen bolatyn. SIM málimdemesinde Minsk "bolyp jatqan oqiǵalardyń astaryn áshkereleitin bultartpas faktilerdi (syrtqy kúshterdiń aralasqanyn dáleldeitin aiǵaqtardy da) kórsetýge daiyn" degen edi.
Belarýs ortalyq sailaý komissiiasynyń málimetinshe, 9 tamyzda ótken prezident sailaýynyń aldyn ala qorytyndysy boiynsha qazirgi basshy Aleksandr Lýkashenko jeńgen. Bul aqparat eldiń túrli qalalarynda narazylyqtyń tutanýyna sebep bolǵan. Narazylar sailaý qorytyndysy burmalandy dep sanaidy. Belarýs biligi narazylyqty basyp jatyr, myńdaǵan adam ustalǵan.
