Ár otbasy múshesine 100 myń teńgeden ótemaqy alý úshin bank kartochkalary qoldaryna tigen Arys turǵyndary alǵystaryn bildirýde, dep habarlaidy QazAqparat tilshisi.
«100 myń teńgelik ótemaqynyń kartochkasyn alyp, yrza bolyp bara jatyrmyz. Barynsha qoldaý bildirip jatqan halyqqa, úkimetke rahmet aitamyn. Shyǵyndar bolyp jatyr. Bári ornymen sheshilip keledi. Eshkimge qapa emespiz. Etek-jeńimiz jiylyp, eńsemiz kóterilip qalatyn boldy», - deidi úiindegi bes adamǵa 500 myń teńge tigeli turǵan Arys qalasynyń turǵyny Abai Moldabekov.
Jarylys bolǵaly beri Arystan attap shyqpaǵan Indýstriia jáne infraqurylymdyq damý vitse-ministri Qaiyrbek Óskenbaev qurylys barysyn kúnde baqylaýǵa alyp, ár sektordyń jumysyn jiti qadaǵalap júr. Onyń aitýynsha, osy aptada Qaraǵandy, Jambyl, Aqmola oblystary ózderine tiesili sektorlardaǵy jumysyn aiaqtaýǵa jaqyn qalǵan.
«Bir ai buryn kishi aýdanda saý qalǵan birde-bir úi qalmap edi. Búgin kóz toiarlyq jóndeý jumystary júrgizilip jatyr. Taqaýda ǵana bastalǵan úiler 10-15 kúnniń ishinde tolyǵymen bitedi dep sanaimyn. Arys turǵyndaryna aitarym: kóp tózdińizder – endi kishkene shydai turyńyzdar. Jumysty túgel bitpei, eshkim eshqaida ketpeidi. Jumystardy tolyǵymen bitirip beremiz», - dedi Qaiyrbek Óskenbaev.
Eske sala ketsek, keshe Arys turǵyndaryna 100 myń teńgeden ótemaqy berý úshin bank kartalary taratyla bastaǵan edi.
«100 myń teńge tirkeýde turǵandarǵa túgel taratylady. Anyqtalǵan 55 myńnan astam adam 12 tamyzdan bastap qarajatqa qol jetkizedi. Búgingi tańda eki aýyldyq eldimeken men Arys qalasyndaǵy 17 sektorda bank kartalary taratylýda. Qyzylorda, Jambyl jáne Shymkent qalasynan «Halyq bankiniń» 120 qyzmetkeri Arysqa arnaiy kelip, jumys júrgizip jatyr», - delingen Túrkistan oblysy ákiminiń baspasóz qyzmetininiń habarlamasynda.
Sondai-aq, Túrkistan oblysy ákiminiń orynbasary Joldymurat Amanbaev aqshany alýdyń tártibin túsindirgen edi.
