QR Energetika vitse-ministri Baqytjan Jaqsaliev para alý kúdigine ilikti. Bul týraly búgin Memlekettik qyzmet isteri jáne sybailas jemqorlyqqa qarsy is-qimyl agenttiginiń resmi ókili Nurlan Jahin baspasóz máslihatynda málim etti, dep habarlaidy "Ult aqparat".
«Agenttiktiń Sybailas jemqorlyqqa qarsy is-qimyl ulttyq biýrosymen Energetika vitse-ministri Jaqsalievtiń Shýchinsk-Býrabai kýrorttyq aimaǵyndaǵy kóldi tazartý boiynsha jumystardy qabyldaý barysyndaǵy zańǵa qaishy áreketteri áshkerelendi. Kúdikti vitse-ministr 2015 jyly «Aimaq i K» JShS merdiger uiymynyń múddesi úshin laýazymdyq ókilettigin teris paidalanǵan», - dedi ol.
Onyń aitýynsha, Jaqsaliev oryndalǵan jumystyń kólemi 30 ese artyq baǵalanǵanyn bile otyryp, jalpy somasy 863 mln teńgeni quraityn sý qoimasynyń túbinen 109 myń tekshe metr shógindilerdi alý týraly aktilerge qol qoiyp, atalǵan somany merdigerge aýdarǵan.
«Sonymen qatar, sot saraptamasynyń qorytyndysy boiynsha aiaqtalmaǵan jumystardyń quny 746 mln teńgeni qurady. Jaqsalievtiń zańsyz áreketteri nátijesinde memleketke atalǵan somaǵa ziian keltirildi. Kúdikti úiqamaqqa alyndy», - dedi Jahin.
Aita keteiik, bul, jemqorlyq kúdigi boiynsha ustalyp otyrǵan Energetika ministriniń ekinshi orynbasary. Aǵymdaǵy jyldyń 2 naýryzy kúni Astana qalasynyń №2 Almaty aýdandyq soty kúdiktiler - Ǵani Sádibekov pen Serikbai Jumalinovke qatysty eki aiǵa qamaýda ustaý túrindegi bultartpaý sharasyn qoldaný jóninde sheshim shyǵardy. Keiin vitse-ministrge qamaýda ustaý túrindegi bultartpaý sharasy úiqamaqqa aýystyryldy.
Ǵ. Sádibekovke «Aimaq» JShS merdigerlik uiymynyń basshysy D. Dýanbekpen sóz bailasyp, Shýchinsk-Býrabai kýrorttyq aimaǵyndaǵy kóldi tazartýǵa bólingen asa iri mólsherdegi biýdjet qarajatyn jymqyrdy degen aiyp taǵylyp otyr. Qylmysqa Energetika ministrliginiń departament basshysy J. Nurbekov jáne merdiger uiymnyń ókilderi S. Jumalinov jáne B. Qadyrberlin de qatysqan.
