QR Energetika vitse-ministri Áset Maǵaýov QR ishki naryǵynda janar-jaǵarmai baǵasynyń qalai qalyptasatynyn túsindirdi, dep habarlaidy QazAqparat.
«QR ishki naryǵynda janar-jaǵarmai baǵasy suranys pen usynys negizinde qalyptasady, iaǵni naryq arqyly retteledi. Baǵa belgileý kezindegi negizgi faktorlar – Qazaqstandaǵy munai quny (ishki baǵalar), protsessing (munai óńdeý qyzmeti), salyqtar men aktsizder, zerthanalyq synaqtar men qospalar shyǵyndary, bank nesiesine qyzmet kórsetý, tsisternalardy berý-jinaý, taýardy tasymaldaý jáne basqa da ilespe shyǵyndar», - dedi Áset Maǵaýov Ortalyq kommýnikatsiialar qyzmetinde ótken baspasóz máslihatynda.
Tutynýshylar úshin túpkilikti baǵa munai óniminiń kóterme quny, avtojanarmai quiý stansasyna deiingi barlyq kólik shyǵyndary, munai bazalarynda saqtaý, bólshek saýdada ótkizýshi shyǵystary jáne aktsizder men salyqtar negizinde qalyptasady.
«Qazirgi ýaqytta Qazaqstanda Ai-92 janarmaiynyń bir litri 160 teńge bolyp tur. Salystyrmaly túrde aitsaq, Qyrǵyz Respýblikasynda baǵa – 185 teńge (16% joǵary), Ózbekstanda – 261 teńge (63% joǵary), Reseide – 255 teńge (59%). Ózderińiz biletindei, munai ónimderiniń naryǵy joǵary qubylmaly bolady jáne janar-jaǵarmai baǵasynyń qalyptasýyna áser etetin birqatar faktorlar bar: RF jáne QR ishki naryǵynda janar-jaǵarmaiǵa baǵa belgileý jáne qamtamasyz etý, kórshi eldermen shekaralas oblystarda janar-jaǵarmaiǵa baǵa belgileý. Atalǵan jaǵdailardy eskere otyryp, baǵa ózgerip turady», - deidi vitse-ministr.
Biylǵy 10 naýryzdaǵy jaǵdaiy boiynsha munai ónimderiniń jiyntyq qory qolaily deńgeide, atap aitqanda benzin boiynsha 225 myń tonna, bul eldiń 20 táýliktik qajettiligin qamtýǵa jetkilikti, al dizel otyny boiynsha 298 myń tonna bar, bul ishki naryqtyń qajettiligin 27 táýlikke qamtamasyz etedi.
