QR Energetika ministri Maǵzum Myrzaǵaliev «KTK-Qazaqstannyń basty eksporttyq baǵyty» atty Kaspii qubyr konsortsiýmynyń 25 jyldyq mereitoiyna arnalǵan paneldik sessiiaǵa qatysty. Shara elordada XIV Eýraziialyq Kazenergy forýmy aiasynda ótýde, dep habarlaidy QazAqparat.
Energetika ministri óz sózinde «Teńiz – Atyraý – Novorossiisk porty» baǵyty qazaqstandyq munai eksporty úshin eń tiimdi jáne qaýipsiz bolyp tabylatynyn atap ótti.
«Qazaqstannan eksporttyq munai qubyryn salý úshin kóptegen nusqalar qaraldy. Munaidy eksportqa tasymaldaýdyń 10-nan astam baǵyty usynyldy, onyń ishinde Resei arqyly Qara teńizge, Iran arqyly Parsy shyǵanaǵyna, Baký – Djeihan arqyly Jerorta teńizine. Saiyp kelgende, sarapshylar eń tiimdi jáne qaýipsiz baǵytty anyqtady: Teńiz – Atyraý – Novorossiisk porty. Oǵan qosa, bul eń qysqa eksporttyq baǵyt boldy», - dedi M.Myrzaǵaliev.
Energetika ministri sondai-aq jobany qurý protsesinde Qazaqstannyń Tuńǵysh Prezidentiniń ózi sheshýshi ról atqarǵanyn erekshe atap ótti.
«Elbasy Nursultan Ábishuly Nazarbaev óziniń tabandylyǵymen jáne bedelimen Kaspii qubyr konsortsiýmyn qurýǵa qol jetkizip, oǵan barlyq múddeli taraptardy tarta aldy. ... Búginde joba tabysty kópjaqty yntymaqtastyqtyń jarqyn mysaly bolyp tabylady. Qazaqstan men Resei aýmaǵy arqyly ótip, Kaspii men Qara teńizdiń eki teńiz jaǵalaýyn jalǵai otyryp, ol Ulybritaniia, Italiia, AQSh, Resei men Qazaqstannyń kóptegen aktsionerlerin biriktirdi», - dep atap ótti ministr.
2001 jyly munai qubyry paidalanýǵa berilgen sátten bastap búgingi kúnge deiin Qazaqstan 745 mln.tonnadan astam munai eksporttady. Osy baǵyt boiynsha eksportqa jetkiziletin Qazaqstan munaiynyń úshten ekisinen astamy ótedi.
KQK qurylysy Teńiz, Qarashyǵanaq siiaqty iri ken oryndarynda munai óndirý kólemin edáýir ulǵaitýǵa, sondai-aq Qashaǵandy igerýdi bastaýǵa múmkindik berdi.
«Búgingi tańda KQK-ny kezeń-kezeńimen keńeitý munai qubyrynyń ótkizý qabiletin jylyna 67 mln.tonnaǵa deiin jetkizdi. Bul rette jylyna 80 mln. tonnaǵa deiin munai ótkizý qabiletin keńeitý mindeti qoiylyp otyr», - dedi Energetika ministri.
