QR Energetika ministri Bolat Aqsholaqov ortalyq kommýnikatsiialar qyzmetinde ótken brifingide Kaspii qubyr konsortsiýmyndaǵy jaǵdaidy baiandady, dep habarlaidy QazAqparat.
«Shynymen de keiingi kúnderi jyljymaly ailaq qondyrǵylarynda apat jaǵdaiy baiqalǵany týraly aqparattar men málimdemeler aityldy. Bizde ondai 3 ailaq bar. Sonyń úshinshisinde apat bolyp, jumys tolyq toqtady. Ekinshi ailaqta da aqaý bar, jumysynda irkilister boldy. Ony da ajyratty. Birinshi ailaq ta jaǵdai zerttelgenshe qaýipsizdik maqsatynda ajyratylǵan bolatyn. Bul - bizdiń munai kenishteri birneshe kún rezervýarǵa súienip jumys isteidi degen sóz. «Novorossiisk» portyndaǵy jyljymaly ailaq qondyrǵylaryndaǵy jóndeý jumystary sozylyp ketse, bizdegi úsh iri munai kenishinde munai óndirý kólemi qysqarýy múmkin», - dedi Bolat Aqsholaqov.
Energetika ministriniń sózine qaraǵanda, atalǵan úsh ailaqtyń birine daýyl kezinde zaqym kelmegen bolýy múmkin.
Bul Qashaǵan, Qarashyǵanaq, Teńiz kenishterinen munai óndirýshilerdiń jaǵdaiyn jeńildetedi.
«Keshe biz Kaspii qubyr konsortsiýmyndaǵy áriptesterimizben tehnikalyq konsýltatsiia júrgizdik. Búgin tańerteń aitylǵan aqparat boiynsha №1 jyljymaly ailaq qondyrǵysy jumys istep ketýi múmkin. Búgin tankerdi janastyryp bastaidy. Bul bizdi munai óndirýde joǵaltatyn múmkindikterden qutqarady. Sondyqtan daýyl basylyp, №1 ailaq jumysqa qosylyp, tankerler munai tieýge jiberiledi dep úmittenemiz. Al №2, 3 ailaqtarda áriptesterimiz 3 apta ishinde jóndeý jumystaryn aiaqtaidy degen úmit bar», - dedi ministr.
