Qazaqstandyq muǵalimder úshin bes kúndik jumys aptasy engiziledi. Bul týraly bilim jáne ǵylym ministri Ashat Aimaǵambetov málimdedi, dep habarlaidy Sputnik Qazaqstan.
Ministr elimizde mektepterdiń bir bóligi bes kúndik oqý aptasyna aýysqanyn atap ótti. Alaida, onyń aitýynsha, bul tusta áli de sheshilmegen máseleler bar.
"Balalar aptasyna bes kún oqysa da, muǵalimder altynshy kúni de mektepke kelýi tiis. Árine, keibir óńirlerde olai emes. Dese de bizde biryńǵai tártip bolýy kerek", - dedi ol dástúrli tamyz konferentsiiasynda.
Aimaǵambetov ministrliktiń zańnamany qarap shyqqanyn, muǵalimderge bes kún jumys isteýge esh nárse kedergi emes ekenin aitty.
"Altynshy kúndi pedagogtar óz qalaýyna qarai ótkizýi tiis. Balalarmen ýaqyt ótkize me, sabaqqa daiyndala ma, ony ózderi sheshedi. Keide bul kúni pedagogikalyq keńes ótkizýge de bolady jáne taǵysyn taǵy. Biraq, eń bastysy, altynshy kún – muǵalimderdiń jeke ýaqyty bolýy tiis", - dedi ol.
Ministr bul tapsyrmany bilim júiesi aldyna qoiyp otyrǵanyn qadap aitty.
Aita ketsek, astanadaǵy Táýelsizdik saraiynda prezidenttiń qatysýymen dástúrli tamyz konferentsiiasy ótti. Jiynǵa respýblikanyń túkpir-túkpirinen eki myńǵa jýyq muǵalim kelgen.
Jiyn barysynda bilim jáne ǵylym salasyndaǵy ózgeristerdi basqarý máseleleri talqylanyp, innovatsiialyq ideialar men bastamalar usynyldy. Sondai-aq birqatar pedagog prezidenttiń qolynan marapat aldy.
