"Elektrondy úkimet" portalynda stýdentterge arnalǵan jańa qyzmet paida boldy. Onyń kómegimen kolledj, ýchilishe jáne kásibi daiyndyq oqý ortalyqtarynyń stýdentteri basqa oqý ornyna aýysýǵa jáne qaita qabyldaýǵa ótinish bere alady.
Onlain ótinish berý úshin eGov.kz portalynda "Bilim" bólimine kirip, "Bilim alýshylardy bilim berý uiymdarynyń úlgileri boiynsha aýystyrý jáne qaita qabyldaý" qyzmetin tańdaý qajet. Sodan keiin barlyq jolaqty toltyrý kerek, dep málimdedi "Ulttyq aqparattyq tehnologiialar" AQ baspasóz qyzmeti.
Keide "Ulttyq bilim berý derekter bazasy" aqparattyq júiesinde joq qujattar portalda kórinbeýi múmkin. Ondai jaǵdaida qoldanýshy málimetterdi ózdiginen engize alady.
Eger stýdent sheteldik bilim berý uiymynan aýyssa, oǵan tómendegi qujattardyń skanerlengen kóshirmesin qosa jiberý kerek:
- meńgerilgen oqý baǵdarlamalary týraly qujat;
- Qazaqstan Respýblikasynda nostrifikatsiialaý rásiminen ótetin bilim berýdiń aldyńǵy deńgeiin aiaqtaǵany týraly qujat;
- sheteldik bilim berý uiymdaryna túsý kezindegi túsý synaqtarynyń nátijeleri.
Qarjylyq qiyndyqqa bailanysty oqýǵa qaita qabyldanǵan jaǵdaida, stýdent oqý aqysyn tólegeni týraly túbirtektiń skanerlengen kóshirmesin qosa usynýy tiis.
Suraý sátti óńdelgen jaǵdaida, qoldanýshynyń jeke kabinetine aýysqany nemese qaita qabyldanǵany, ne bolmasa qujattaryn qabyldaýdan bas tartqany týraly habarlama keledi.
