Foto: Aqorda
Qasym-Jomart Toqaev Eńbek jáne halyqty áleýmettik qorǵaý ministri Svetlana Jaqypovany qabyldady, dep habarlaidy Ult.kz.
Memleket basshysyna áleýmettik damý, eńbek qatynastary salalarynyń qazirgi jai-kúii men aldaǵy jospary jóninde baiandaldy.
Svetlana Jaqypova biylǵy 1 mamyrǵa deiin 157,8 myń adamdy eńbekpen qamtý sharalary júrgizilgenin jetkizdi. Olardyń ishinde 143,2 myń azamat jumysqa ornalastyrylǵan. Jyl basynan beri 232 myńnan astam adamǵa ataýly áleýmettik kómek kórsetilgen.
Prezidentke eńbek qaýipsizdigin qamtamasyz etý jáne eńbek quqyǵyn qorǵaý boiynsha qabyldanǵan sharalar týraly aqparat berildi. Júieli jumystyń nátijesinde óndiristik jaraqat alý kórsetkishi biylǵy I toqsanda 17 paiyzǵa tómendedi, al ólimge ákep soǵatyn qaiǵyly oqiǵalar ótken jyldyń osy kezeńimen salystyrǵanda 5 paiyzǵa azaidy. Budan bólek, kásiptik táýekelderdi anyqtaý, baǵalaý jáne aldyn alý, sondai-aq eńbek qatynastaryn deklaratsiialaý tetikteriniń avtomattandyrylǵan júiesi engizilip jatyr.
Svetlana Jaqypova Jobalardyń innovatsiialyq navigatoryn engizý jóninde aitty. Bul memlekettik investitsiianyń tiimdiligin arttyrý jáne jumys oryndaryn sapaly túrde josparlaý úshin ázirlendi.
Qasym-Jomart Toqaevqa áleýmettik qoldaý kórsetý úderisin tsifrlandyrý jumystary tanystyryldy. Atap aitqanda, ministr áleýmettik-ekonomikalyq ornyqtylyq pen osal otbasyny baǵalaýǵa arnalǵan skoringti modeldi qoldaný tujyrymdamasyn usyndy. Bul jobany engizý qarajatty shyn muqtaj jandardyń paidasyna qaita bólýge jáne qoldaý sharalarynyń naqty iesine jetýine múmkindik beredi.
Kezdesý sońynda Memleket basshysy áleýmettik saiasatty odan ári jetildirýge, ataýly kómektiń tiimdiligin arttyrýǵa, jumyspen qamtý sharalaryn keńeitýge, eńbek jáne áleýmettik salalardy tsifrlandyrýǵa baǵyttalǵan birqatar tapsyrma berdi.
