QR Eńbek jáne halyqty áleýmettik qorǵaý ministrliginiń aýmaqtyq ókilderi múmkindigi shekteýli azamattardan para alyp kelgen dep aiyptalýda, dep habarlaidy QazAqparat Sybailas jemqorlyqqa qarsy is-qimyl agenttigine silteme jasap.
QR Sybailas jemqorlyqqa qarsy is-qimyl agenttiginiń Atyraý oblysy boiynsha departamenti QR Eńbek jáne halyqty áleýmettik qorǵaý ministrligi Eńbek, áleýmettik qorǵaý jáne kóshi-qon komitetiniń Atyraý oblystyq departamentiniń basshysy jáne osy vedomstvonyń bólim basshysyna qatysty isti tergeýde. Atalǵan tulǵalarǵa múgedektikti rastaityn qujatty kedergisiz uzartý úshin múmkindigi shekteýli azamattardan 30 myńnan 70 myń teńgege deiin para alyp keldi dep aiyp taǵylyp otyr.
«Qylmystyq protsessýaldyq kodekstiń 201-babyna sáikes ózge aqparat tergeý múddesine orai jariialaýǵa jatpaidy», - delingen vedomstvo málimetinde.
