Elektrondyq eńbek birjasynda 2,5 million belsendi eńbek sharty bar. Bul týraly QR Eńbek jáne halyqty áleýmettik qorǵaý vitse-ministri Erbol Ospanov Antikor.Live baǵdarlamasynda aitty, dep habarlaidy QazAqparat.
«Elektrondyq eńbek sharty – biregei joba. Biz qaǵazdan jasalǵan eńbek kelisimsharttary Keńes odaǵynan beri bar ekenin túsinemiz jáne keibireý bul kelisimshartty joǵaltyp alsa, endi biri durys rásimdemegen bolýy múmkin. Mundai jaǵdaida muraǵattan anyqtama alýǵa týra keledi. Eki jyl buryn biz tujyrymdama jasap, onda ár jumys berýshini óz qyzmetkerleriniń eńbek sharttaryn tirkeýge mindettedik», - deidi QR Eńbek jáne halyqty áleýmettik qorǵaý vitse-ministri Erbol Ospanov.
Ol elektrondyq eńbek shartynyń jumys berýshi men jumysshy úshin qandai paidasy bar ekenin aitty.
«Júieniń úsh qatysýshysy bar, olar – qyzmetker, jumys berýshi jáne memleket. Endi qyzmetkerge qaǵaz túrindegi eńbek kitapshasy qajet emes. Ol árdaiym óziniń elektrondy úkimet portalyndaǵy, elektrondyq eńbek birjasyndaǵy jeke kabinetinde qai jerde, kimmen jáne qashan jumys istegeni týraly derekterdi ala alady. Qujattardyń joǵalýy oǵan qaýip tóndirmeidi jáne qujatty kez kelgen ýaqytta basyp shyǵara alasyz. Eger jumys berýshi qyzmetkerdiń quqyǵyn buzsa, qyzmetker muny árdaiym zeinetaqy jarnalary, meditsinalyq saqtandyrý, áleýmettik saqtandyrý jáne jumys rejiminen kóre alady. Jumys berýshi qyzmetkerdiń quqyǵyn buzyp, oǵan eńbek kitapshasyn bermei qoiatyn jaǵdailar da kezdesedi. Elektrondyq eńbek sharty mundai máselelerdiń aldyn alady. Eń aldymen, bul - qyzmetkerdiń quqyǵyn qorǵaý», - deidi ol.
Elektrondyq eńbek shartyn engizý kelesi jyly aiaqtalady dep josparlanýda.
«Biz óz tarapymyzdan osy qyzmetterdiń jumys isteýi úshin barlyq jaǵdaidy jasaýymyz kerek. 2020-2021 jyldary biz barlyq jumys berýshilerdi qoldanystaǵy eńbek sharty boiynsha tirkeýge alýymyz qajet. Búgingi kúni 55 myńǵa jýyq jumys berýshi jumys isteidi jáne 2,5 millionnan astam belsendi eńbek sharttary tirkelgen. Jyl sońyna deiin biz bul deńgeidi 70-75%-ǵa jetkizýdi kózdep otyrmyz jáne kelesi jyly jumys berýshilermen birge bul protsesti aiaqtaimyz», - deidi Erbol Ospanov.
