QR Eńbek jáne halyqty áleýmettik qorǵaý vitse-ministri Nariman Muqyshev 42 500 teńge áleýmettik tólemge qatysty jurtshylyqty tolǵandyratyn eń mańyzdy 2 saýalǵa jaýap berdi, dep habarlaidy "Ult aqparat".
Vitse-ministrdiń Instagram paraqshasynda jazýynsha, el turǵyndarynan biryńǵai jiyntyq tólemdi ýaqytyly tólegenimen 42 500 teńge berilmeitini týraly habarlama alǵandyǵyna qatysty saýal jii túsip jatyr.
«Biryńǵai jiyntyq tólem tólenip, belgili bir sebeptermen onyń bizge ótinishtiń ózinen keiin túsýine qatysty máseleler zerdelendi jáne qaraýǵa qaita jiberildi. Eger siz ótinim bergen kezde tólengen biryńǵai tólemniń bolmaýyna bailanysty bas tartylǵandyǵy týraly habarlama kelse mártebeńizdi qaita tekserińiz», - dedi ol.
Turǵyndardan jii túsetin saýal durys esepshoty bolǵanymen servis qate esepshot dep kórsetetindigi jaiynda bolyp otyr.
Osyǵan qarai Eńbek vitse-ministri IBAN 20 tańbadan turatyndyǵyn jáne onyń bir tańbasy ózgergen jaǵdaida múldem basqa banktegi ózge esepshot bolyp shyǵatyndyǵyn aitady.
«Soǵan qarai tólem talaby ótpeidi. Biraq, biz bul ótinimderdi qaita qaradyq jáne endigi ýaqytta erejege sáikes olardy esepshottaǵy qate nómirdi alyp bastap ary qarai jiberemiz. Eger sizge tólem taǵaiyndalatyn bolsa, onda esepshotty surap SMS keledi. Jaýap bergen kezde árbir san men áriptiń (latyn álipbiinde) durys ekendigin mindetti túrde tekserýlerińizdi ótinemiz», - dedi Nariman Muqyshev.
