Memleket basshysy Qasym-Jomart Toqaev Eńbek jáne halyqty áleýmettik qorǵaý ministri Birjan Nurymbetovti qabyldady, dep habarlaidy Aqordanyń resmi saity.
Qasym-Jomart Toqaevqa ministrliktiń ataýly áleýmettik kómek berýdiń jańa tártibin júzege asyrý, kópbalaly otbasylarǵa tabys kólemine qaramastan járdemaqy berý, sonymen qatar, múmkindigi shekteýli azamattarǵa áleýmettik qoldaý kórsetý baǵytynda atqaryp jatqan keshendi sharalary jaiynda baiandaldy.
Prezidentke «Eńbek» baǵdarlamasynyń iske asyrylý barysy, onyń ishinde, jaǵdaiy tómen jáne kóp balaly otbasylarǵa shaǵyn kredit berý tártibi, jumys berýshilerdiń usynysy boiynsha bólinetin bilim granttary, jastardyń jańa jobalary týraly málimet berildi. Sondai-aq, shet elden jumys kúshin tartý máselesi boiynsha Bas prokýratýramen birlesip júrgizgen tekserýlerdiń qorytyndysy jaiynda aityldy.
Eńbek jáne halyqty áleýmettik qoldaý ministri Prezidentke memlekettik qyzmetshilerdiń merekelerden keiin keletin demalys kúnderi jumysqa shyǵýy Qazaqstan zańnamasyna qaishy emes ekenin jáne ózgertýler engizýdi talap etpeitinin jetkizdi. Memleket basshysynyń tapsyrmasy Eńbek kodeksin tolyq saqtai otyryp, kezek kúttirmeitin jáne mańyzdy mindetterdi oryndaý úshin «Qazaqstan Respýblikasynyń Memlekettik qyzmet týraly» Zańǵa sáikes oryndalady. Eńbek kodeksi boiynsha memlekettik qyzmetshiler jumysqa óziniń jazbasha kelisimimen shyǵady jáne olardyń bir kúndik jumysynyń eńbekaqysy keminde 1,5 ese kóleminde tólenedi. Merekelerden keiin keletin demalys kúnderi jumysqa Prezident Ákimshiliginiń, Úkimettiń, ortalyq memlekettik organdar men basqa da vedomstvolardyń kezek kúttirmeitin jáne mańyzdy mindetterge jaýapty qyzmetkerleri tartylady.
Qasym-Jomart Toqaev Birjan Nurymbetovke ataýly áleýmettik kómek alatyn eńbekke jaramdy azamattardy jumyspen qamtýdyń naqty sharalaryn qabyldaýdy, az qamtylǵan otbasylardyń tabysyn arttyrýdy, múmkindigi shekteýli azamattarǵa áleýmettik qoldaý kórsetýdi tapsyrdy. Sonymen qatar Prezident shet elden jumys kúshin tartý máselesin erekshe baqylaýda ustaý qajettigin basa aitty.
