Biylǵy tórt aida eńbek qaýipsizdigi salasynda 1299 tekserý júrgizildi, dep habarlaidy "Ult aqparat".
«Memlekettik eńbek inspektorlary 2020 jyldyń 4 aiynda eńbek qaýipsizdigi jáne eńbekti qorǵaý salasynda 1299 tekserý júrgizdi, olardyń barysynda 529 ereje buzýshylyq anyqtaldy. Jumys berýshilerge eńbek qaýipsizdigi jáne eńbekti qorǵaý salasyndaǵy kemshilikterdi joiý týraly 51 nusqama shyǵarylyp, 3,2 mln teńge kóleminde 36 ákimshilik aiyppul salyndy», - delingen Eńbek jáne halyqty áleýmettik qorǵaý ministrligi málimetinde.
Eńbek qaýipsizdigi jáne eńbekti qorǵaý máseleleri boiynsha zańdy jáne jeke tulǵalardyń 230 ótinishi qaraldy, óndiristegi jazataiym oqiǵalarǵa 342 arnaiy tergeý júrgizildi.
«Jumysshylardyń ómiri men densaýlyǵyna tóngen naqty qaýipke bailanysty memlekettik eńbek inspektorlarynyń talaby boiynsha jumys berýshiler eńbek qaýipsizdigi jáne eńbekti qorǵaý erejelerin buzǵany úshin kináli 5 laýazymdy adamdy qyzmetten bosatty. 1 uiymnyń qyzmetine tyiym salyndy. 263 is quqyq qorǵaý organdaryna joldandy, olar boiynsha 27 qylmystyq is qozǵaldy. Memlekettik organdar men jumys berýshilerdiń eńbekti qorǵaý salasyndaǵy qabyldaǵan keshendi sharalary óndiristik jaraqattanýdy azaitýdyń oń úrdisin saqtaýǵa múmkindik berdi», - dep atalyp ótken vedomstvo habarlamasynda.
Budan buryn habarlanǵandai, 2020 jylǵy qańtar-sáýir ailary aralyǵynda respýblikanyń kásiporyndarynda 365 jazataiym oqiǵa tirkeldi. Onyń saldarynda 413 adam jaraqat aldy.
