«Eńbek» baǵdarlamasy aiasynda kásibin dóńgeletkender jylyna 73 mlrd teńgeniń ónimin shyǵaryp otyr. Bul týraly QR Eńbek jáne halyqty áleýmettik qorǵaý ministri Birjan Nurymbetov aitty, dep habarlaidy QazAqparat tilshisi.
«Jańa jumys oryndaryn qurý baǵytynda «Eńbek« baǵdarlamasynyń sharalary 739 myń jumys ornyn qurýdy qamtamasyz etti. Onyń ishinde 153 myń turaqty jumys oryndary jáne 586 myńy ýaqytsha jumys oryndary quryldy. Alǵashqy tolyq úsh jylda turaqty jumys oryndarynyń sany 7 esege artty. 153 myń turaqty jumys orny shaǵyn nesieler men granttar berý arqyly jańa kásipkerlerdi qalyptastyrý esebinen qamtamasyz etildi», - dedi ministr Májilistegi Úkimet saǵatynda.
Onyń aitýynsha, Eńbek« memlekettik baǵdarlamasynyń shaǵyn nesie berý sharttary óte jeńil. Baǵdarlama aiasynda jyldyq mólsherlemesi 6 paiyzben 7 jylǵa deiin 22 mln teńge alýǵa bolady.
Kepildendirý tetikteri de bar. Munan bólek baǵdarlama aiasynda 200 ailyq eseptik kórsetkish nemese 555 myń teńge qaitarymsyz granttar da qarastyrylǵan.
«Grant tabysy az jáne kópbalaly otbasylardyń múshelerine, qonys aýdarýshylarǵa beriledi. Alǵashqy úsh jylda shaǵyn nesie alýshylardyń sany 2,5 esege, qosymsha qurylǵan jumys oryndarynyń sany 5 ese artqan. Jalpy baǵdarlamaǵa qatysýshylar esebinen shaǵyn jáne orta biznes salasyndaǵy jumyspen qamtý ósimi 11 paiyzdy quraidy. Olardyń shyǵarǵan ónimderiniń kólemi jylyna 73 mlrd teńge kóleminde baǵalanady», - dedi Birjan Nurymbetov.
