Úkimet basshysy Asqar Mamin Májilis ókilderiniń «Eńbek» baǵdarlamasyna bólingen qarjynyń qysqarǵany týraly depýtattyq saýalyna jaýap berdi, dep habarlaidy "Ult aqparat".
Májilis depýtattary Elnur Beisenbaev, Iýrii Jýlin jáne Erlan Sairov Premer-Ministr Asqar Maminniń atyna «Eńbek» memlekettik baǵdarlamasynyń sheńberinde mikrokredit berý máselesi jónindegi depýtattyq saýal joldaǵan bolatyn.
«Eńbek» baǵdarlamasynyń nesielendirý baǵyty boiynsha 2020 jyly aýyl turǵyndaryna 43,3 mlrd teńgege 11 294 jýyq nesie berildi. Osy baǵdarlama aiasyndaǵy biylǵy jyldyń biýdjeti 20 mlrd teńgeni ǵana qurap otyr. Iaǵni, biyl shaǵyn nesie alýshylardyń sany 5200-ge azaiady. Pandemiia kezinde, Ulttyq ekonomika jáne Eńbek jáne halyqty áleýmettik qorǵaý ministrlikteriniń keri pozitsiiasy bizge túsiniksiz», - dei kele, depýtattar shaǵyn nesie berýdegi basty problema kepilzat qoiý ekenin, bankterdiń qala irgesindegi aýyldar bolmasa, shalǵaidaǵy eldi mekenderdiń halqyna nesie berýge qulyqty emes ekenin másele etip kótergen.
Úkimet basshysy óz jaýabynda «Eńbek» baǵdralamasy boiynsha beriletin nesieniń kólemi nege qysqartylǵany týraly málimet bergen.
«Eldegi qalyptasqan ekonomikalyq jaǵdai sharttarynda Baǵdarlama boiynsha aýyldyq eldi mekenderde mikrokreditteý úshin 2021 – 2023 jyldarǵa arnalǵan biýdjet limitteri 20 mlrd teńgege deiin qysqartylǵan. 40,3 mlrd teńge kóleminde qosymsha qarjylandyrý bólý máselesi 2021 jylǵa arnalǵan respýblikalyq biýdjetti alǵashqy naqtylaý sheńberinde qarastyrylatyn bolady. Bul atalmysh baǵdarlama sheńberinde shamamen 10 myń mikrokredit berýge múmkindik beredi», - delingen jaýapta.
Asqar Mamin shaǵyn nesie alýshylardy kepilmen qamtamasyz etýge «Aýyl sharýashylyǵyn qarjylai qoldaý qory» AQ jaýapty ekenin eske salady.
«Kepildik mikroqarjylyq uiymdar men nesie seriktestikteri arqyly mikrobiznes ashýǵa, jumys istep turǵan biznesti keńeitýge, aýyldyq eldi mekenderde jáne shaǵyn qalalarda kooperativter qurýǵa arnalǵan mikrokreditter boiynsha beriledi», - degen Premer-Ministr isin jańa bastaǵan kásipker men zákirlik kooperatsiiaǵa qatysýshylar úshin kepildik somasynyń 85%-yn, jumys istep turǵandar úshin – 50%-yn, al az qamtylǵan jáne kóp balaly otbasy músheleri úshin kredit somasynyń 95%-ynan aspaitynyn aitady.
