«Eńbek» memlekettik baǵdarlamasy aiasynda 184 myńǵa jýyq adam jumysqa ornalasty. Bul týraly Úkimet otyrysynda QR Eńbek jáne halyqty áleýmettik qorǵaý ministri Birjan Nurymbetov aitty, - dep habarlaidy QazAqparat.
Onyń aitýynsha, 2020 jyly «Eńbek» memlekettik baǵdarlamasyn júzege asyrýǵa 176 mlrd teńge qarastyrylǵan. Atalǵan somanyń 71,5 mlrd teńgesi mikrokreditter men granttarǵa, 32,6 mlrd teńge oqytýǵa, 71,9 mlrd teńge sýbsidiialanatyn jumys oryndaryna jumysqa ornalastyrýǵa jáne jumys kúshi bar aimaqtardan jumys kúshi jetispeitin aimaqtarǵa adamdardy kóshirýge arnalǵan sýbsidiialarǵa baǵyttalady.
«Jyl basynan beri 225 myń adam «Eńbek» memlekettik baǵdarlamasynyń qatysýshysy boldy. Onyń ishinde 184 myń adam jumysqa ornalastyryldy. Munda 99 myń adam turaqty jumyspen qamtyldy», - dedi Birjan Nurymbetov.
Sondai-aq, ol memlekettik baǵdarlama aiasynda 8 myń AEK-ke deiingi jeńildetilgen kreditter 200 AEK-ke deiingi mólsherde qaitarymsyz granttar beriletindigin jetkizdi. Jyl basynan beri 6,1 myń adam biznesti damytýǵa mikrokreditter men granttar alǵanyn aitty.
«Memlekettik baǵdarlamada jumyssyzdarǵa, ásirese jastarǵa eńbek naryǵynda óz ornyn tabýǵa kómektesý úshin kásiptik bilim berýdiń birneshe túri qarastyrylǵan. Koronavirýsqa bailanysty shekteýlerge bailanysty oqý kýrstary endi bastalýda. Jyl sońyna deiin 100 myńnan astam jumyssyz jan jańa kásipter men daǵdylardy úirenýge múmkindik alady», - dep tolyqtyrdy Birjan Nurymbetov.
Sondai-aq, Eńbek ministri jyl basynan beri 84 myń adam sýbsidiialanatyn jumys ornyna jumysqa tartylǵanyn atap ótti.
